ქართულად საუბარი მოდურია!

ჩვენს ყოველდღიურობაში არც თუ ისე იშვიათად ვხვდებით ტერმინებს, რომელიც უცხოური ენებიდან არის შემოჭრილი და საკმაოდ მყარად არის დაფუძნებული ქართულ რეალობაში, დაწყებული მაღაზიის წარწერებით, დამთავრებული ადამიანების სასაუბრო ლექსიკით. განსაკუთრებით, უცხოური ტერმინები გვხვდება საქმიანი ადამიანების საუბრისას.

იხილეთ ქუჩის გამოკითხვა ამ თემაზე

დღეს ჩვენი სასაუბრო თემა ქართველების ლექსიკაში უკვე დამკვიდრებული სამი უცხოური ტერმინი იქნება - პრაისი, დისქაუნთი, რესერჩი (Price, Discount, Research). მიუხედავად იმისა, რომ ქართულ ენაში ამ სამი სიტყვის შესატყვისი მარტივად მოიძებნება (ფასი, ფასდაკლება, კვლევა), მაინც ინგლისურ ვარიანტს ვანიჭებთ უპირატესობას. რატომ ხდება ასე, ამაზე პასუხი კონკრეტული პასუხი შესაძლოა არც არსებობდეს. ერთ-ერთ მთავარ მიზეზად შეიძლება განვიხილოთ, ბიზნეს მიმართულების სასწავლო ლიტერატურა, რომელიც ძირითადად ინგლისურ ენაზეა, თუ არ ჩავთვლით ბოლო დროს გამოცემულ ქართულ ენაზე ნათარგმნ ბიზნეს ლიტერატურას. სასწავლო პროცესიდან ამ ტერმინებმა ყოველდღიურ საუბარშიც აქტიურად გადმოინაცვლა, გარკვეულწილად, მოდურიც კი გახდა. თუ უცხო ტერმინებით საუბრობ ბიზნეს შეხვედრაზე ე.ი "გამორჩეული ხარ". არადა, რომ დავფიქრდეთ, რატომ შეიძლება მოდური იყოს, ჩვენთვის არამშობლიურ ენაზე გარკვეული სიტყვების წარმოთქმა?!

იმის გასარკვევად, თუ რამდენად კარგად ესმის მოსახლეობას უცხოური ტერმინები (Price, Discount, Research) გამოკითხვა ჩავატარეთ, რომელმაც აჩვენა, რომ გამოკითხულთა ნაწილმა სულაც არ იცის ამ სიტყვების მნიშვნელობა. კითხვაზე, რატომ საუბრობთ ინგლისური ტერმინებით, გამოკითხულთა ნაწილი ამბობს, რომ ეს ტენდენციაა ან უბრალოდ მოდურია: "არ ვიცი ალბათ იმიტომ, რომ ახლა ინგლისურად საუბარი მოდურია" , "მე სულ ინგლისურად ვსაუბრობ იმიტომ, რომ მინდა შევეჩვიო საუბარს" . პასუხი მრავალფეროვანია, თუმცა უმეტესობის აზრით, იმ შემთხვევაში, თუ უცხოური სიტყვების ქართული შესატყვისი არსებობს, კარგი იქნება, თუ მათი გამოყენებით ვისაუბრებთ.

ახალი კამპანია #ისაუბრექართულად პროექტ "იყიდე ქართულის" შემადგენელი ნაწილია. ჩვენი გამოკითხვა უბრალოდ ფაქტია, არჩევანი კი თქვენზეა. ვისწავლოთ, გავიგოთ სიტყვების მნიშვნელობა, გამოვიყენოთ ის, სადაც ამას საჭიროება მოითხოვს, მოდურად კი დღეს ქართული საუბარი ვაქციოთ, უბრალოდ ვისაუბროთ ქართულად.