სიმსივნეს გადარჩენილი 12 წლის ბიჭის დებიუტი კარნეგი ჰოლში - დენიელის ამაღელვებელი ისტორია

დენიელ კოლანერს ექიმებმა მეოთხე სტადიის ნეურობლასტომა 6 თვის ასაკში დაუდგინეს, მათი ვარაუდით, სიმსივნეს ბავშვი ვერ გადაურჩებოდა.

დენიელმა ქიმიოთერაპიის რამდენიმე კურსი ჩაიტარა, მას, ასევე, რამდენჯერმე გაუკეთეს ოპერაციაც. ტვინს განვითარების ტემპი რომ შეენარჩუნებინა, ექიმებმა მშობლებს ურჩიეს, მუსიკის დაკვრა ესწავლებინათ ბავშვისთვის. ამის შემდეგ კი ფორტეპიანო დენიელის გამოჯანმრთელების მნიშვნელოვანი ფაქტორი გახდა.

წლები გავიდა და სიმსივნემ რეგრესი დაიწყო, ბიჭის მუსიკალური მონაცემები კი ბევრს აოცებდა. გასულ შაბათ-კვირას 12 წლის უნიჭიერესმა ბიჭმა ნიუ-იორკის კარნეგი ჰოლში შოპენის Fantaisie Impropmtu შეასრულა.

დენიელი დარბაზის აკუსტიკით და როიალით აღფრთოვანებული დარჩა.

ბიჭი ძალიან კარგი მოსწავლეა, კითხვა 3 წლის ასაკიდან დაიწყო. ყოველ დღე, 4 საათის განმავლობაში ის ფორტეპიანოსა და ორღანზე უკრავს.

სიმსივნე, ფაქტობრივად გაქრა, თუმცა დენიელს მკურნალობის კურსის გავლა მაინც ხშირად უხდება.

მომზადებულია people.com-ის მიხედვით