ეუთო-ს სადამკვირვებლო მისია აღმოსავლეთ უკრაინაში, მარიუპოლთან ახლოს სოფელ შიროკინოსთან პრორუსი მებრძოლების გააქტიურების შესახებ იტყობინება. "ბიბისის" ცნობით, ორგანიზაციის დაკვირვებით, შიროკინოში გუშინ თავდასხმები ყველაზე ინტენსიური იყო მინსკის შეთანხმების მიღწევის შემდეგ. დამკვირვებლების ცნობით, 26 აპრილს სროლის ხმა 12 საათს გაგრძელდა. უპილოტო საფრენმა აპარატებმა 11 ტანკი და ოთხი ჯავშანტრანსპორტიორი შენიშნეს შიროკინოს ჩრდილოეთით, აღნიშნულ ტერიტორიას დონეცკის ე.წ. სახალხო რესპუბლიკა აკონტროლებს. გასული სამი დღის განმავლობაში კი 17 ტანკი, სამი თვითმავალი ჰაუბიცა და 60 ჯავშანტრანსპორტიორი შენიშნეს.
უკრაინის პრეზიდენტის ადმინისტრაციის წარმომადგენელმა, ალექსანდრ მატუზიანიკმა გუშინ განაცხადა, რომ დონბასში "ბოევიკების" თავდასხმებს კიდევ ერთი სამხედრო ემსხვერპლა. მისივე თქმით, ამ დროისათვის ყველაზე დაძაბული ვითარება შიროკინოსა და დონეცკის აეროპორტთან არის.