ეგვიპტეში სამდღიანი გლოვა გამოცხადდა

ეგვიპტის პრეზიდენტის გადაწყვეტილებით, კაიროს კოპტურ ეკლესიაში, ტერაქტის შედეგად დაღუპულთა გამო, დღეიდან სამდღიანი გლოვა გამოცხადდა. ამის შესახებ ქვეყნის პრეზიდენტის ადმინისტრაციის მიერ გავრცელებულ ინფორმაციაშია ნათქვამი.

მასში ასევე აღნიშნულია, რომ პრეზიდენტი აბდელ ფათახ ას-სისი ტერაქტს გმობს და ტრაგედიის შედეგად გარდაცვლილთა ახლობლებს სამძიმარს უცხადებს.

ეგვიპტის დედაქალაქ კაიროში კოპტების წმინდა მარკოზის სახელობის ტაძართან მომხდარი აფეთქების შედეგად, ბოლო ინფორმაციით, სულ მცირე, 25 ადამიანი დაიღუპა.

აფეთქება ადგილობრივი დროით დილის 10:00 საათზე მოხდა. შემთხვევის შედეგად 35-ზე მეტი ადამიანი დაშავდა. ისინი ადგილობრივ საავადმყოფოში გადაიყვანეს.

ქრისტიანი-კოპტების რაოდენობა, სხვადასხვა მონაცემების მიხედვით, ეგვიპტის მოსახლეობის 10-15 პროცენტს შეადგენს.