დაახლოებით 40-მა თურქმა სამხედრო მოსამსახურემ, რომლებიც გერმანიის ტერიტორიაზე ნატო-ს ბაზებზე მსახურობენ, განაცხადი შეიტანეს გერმანიაში პოლიტიკური თავშესაფარის მიღების თაობაზე. აღნიშნულის შესახებ გერმანული ჟურნალი Spiegel იუწყება.
გამოცემის ინფორმაციით, საუბარია მაღალი რანგის ოფიცრებზე. გერმანიის მიგრაციისა და დევნილების ფედერალურ უწყებაში და გერმანიის შსს-ში აღნიშნეს, რომ მათ განაცხადებს ჩვეულებრივი წესის მიხედვით განიხილავენ.
"უეჭველია, რომ ჩვენ არ შეგვიძლია ეს სამხედროები უკან თურქეთში დავაბრუნოთ. მათ იქ ციხეში ჩასვამენ", - განაცხადა ბუნდესტაგში მმართველი კოალიციის ფრაქციის ექსპერტმა შიდა პოლიტიკის საკითხებში შტეფან მაიერმა.
როგორც ცნობილია, 2 თებერვალს გერმანიის კანცლერი ანგელა მერკელი ოფიციალური ვიზიტით თურქეთში გაემგზავრება.