აშშ-ის ფინანსთა სამინისტრომ დოკუმენტი გამოაქვეყნა „გენერალური ლიცენზია #1“, რომელიც ამსუბუქებს რუსეთის უსაფრთხოების ფედერალური სამსახურის (ფსბ) მიმართ დაწესებულ სანქციებს.
ამიერიდან ამერიკულ კომპანიებს შეეძლებათ რუსულ სპეცსამსახურთან „გარკვეული“ გარიგებები დადონ, თუმცა აქამდე ყველა კონტაქტი აკრძალული იყო.
გამოქვეყნებული დოკუმენტი არ ნიშნავს ობამას ადმინისტრაციის მიერ დაწესებული სანქციების მოხსნას. ის მხოლოდ საშუალებას მისცემს ამერიკულ კომპანიებს რუსეთში დაშიფრვის სისტემის ელექტრონული მოწყობილობების ექსორტს, რაზეც რუსეთის უსაფრთხოების ფედერალური სამსახურის ნებართვაა საჭირო.
დოკუმენტის მიხედვით, ამერიკული კომპანიები შეძლებენ „მოითხოვონ, გამოიყენონ და გადაიხადონ რუსეთის უსაფრთხოების ფედერალური სამსახურის მიერ იმპორტისთვის გამოცემული ან დარეგისტრირებული ლიცენზიები, სერტიფიკატები ან ნებართვები რუსეთში საინფორმაციო ტექნოლოგიების პროდუქციის გავრცელების ან გამოყენებისთვის იმ პირობით, რომ ამ ლიცენზიების წლიური საფასური 5 000 აშშ დოლარს არ აჭარბებს“.
აღსანიშნავია, რომ როგორც ადრე ამერიკულ კომპანიებს ეკრძალებათ „ნებისმიერი პროდუქციის, ტექნიკური სშუალებების ან უზრუნველყოფის საშუალებების ექსპორტი, რეექსპორტი და მიწოდება ყირიმის ტერიტორიაზე“.