კანონმორჩილი და სისასტიკით ცნობილი კრიმინალები - იაპონური მაფიის დღემდე უცნობი ფაქტები

კანონმორჩილი და სისასტიკით ცნობილი კრიმინალები - იაპონური მაფიის დღემდე უცნობი ფაქტები

ნებისმიერ, ყველაზე ცივილიზებულ ქვეყნებსაც კი, კანონმორჩილი მოქალაქეების გვერდით თავისი კრიმინალები ჰყავს, რომლებიც დანაშაულებრივ საქმიანობას წვრილმანებით იწყებენ, მერე კი, ისეთ ძლიერ ორგანიზაციას ქმნიან, რომელთან ბრძოლაც პრაქტიკულად შეუძლებელი ხდება. გამონაკლისი არც აზიის ერთ-ერთი ყველაზე წარმატებული ქვეყანა იაპონიაა, სადაც უკვე დიდი ხანია მოქმედებს მაფია - ე.წ. იაკუძა, რომელიც რონინებისგან ანუ გაღატაკებული დიდგვაროვანი სამურაებისგან იღებს სათავეს.

* იაკუძას გზის დასაწყისი

სახელი დანაშაულებრივმა ორგანიზაციამ ბანქოს თამაშისგან "იოტო-კაბუსგან" მიიღო. საკმაოდ მარტივი თამაშის მთავარი პრინციპი ბანქოს ქაღალდით გარკვეული რაოდენობის დაგროვებაა. ყველაზე ცუდ წყობად კი - რვიანი, ცხრიანი და სამიანი, ანუ "ია", "კუ" და"სა" ითვლება. სწორედ აქედანაა "იაკუძას" სახელიც, რომელიც გავრცელებული ვერსიით, სამი ცალკეული დაჯგუფების: მატი-იოკოს, ტეკიას და ბაკუტოს გაერთიანებით გაჩნდა.

* მატი-იოკო, ტეკია და ბაკუტო

რამდენიმე საუკუნის წინ, ბატონების გარეშე დარჩენილი სამურაები, რომელთაც არაფერი ჰქონდათ საკუთარი სისასტიკისა და საბრძოლო გამოცდილების მეტი, მცირერიცხოვან ბანდებში გაერთიანდნენ და ჯერ, მოგზაურებსა და ვაჭრებს ძარცვავდნენ, მერე კი, ქალაქებისა და სოფლების აოხრება დაიწყეს. ყოფილ სამურაებს ბრძოლა ყველაზე თამამებმა - ჩხუბისთავებმა, ბანქოს მოთამაშეებმა, ჯიბის ქურდებმა გამოუცხადეს და გამარჯვებაც მალე იზეიმეს. თუმცა, მოსახლეობის სიხარული ხანმოკლე აღმოჩნდა, რადგან ახლა მათი მხსნელები იქცნენ მჩაგვრელებად, რომელთა ბოროტმოქმედება არაფრით განსხვავდებოდა სამურაების სისასტიკისგან. სწორედ მათ - ახლად ჩამოყალიბებულმა მძარცველებმა და მოძალადეებმა მიიღეს მატი-იოკოს სახელი.

მატი-იოკოსგან განსხვავებით, ტეკიას წარმომადგენლები არა მოძალადეები, არამედ თაღლითები იყვნენ, რომლებიც მთელ ქვეყანაში ექიმბაშების სახელით დაეხეტებოდნენ და მოსახლეობას "ჯადოსნურ" სამკურნალო ბალახს სთავაზობდნენ. ასორტიმენტის გაფართოებასთან ერთად ყოფილმა "მკურნალებმა" სტატუსი შეიცვალეს და მეწვრილმანეები ანუ "ტეკია" დაირქვეს, საკუთარი კოდექსი: "არ მოატყუებ - ვერ გაყიდი" შეიმუშავეს და დიდ ჯგუფებში გაერთიანდნენ, რათა კოლექტიურად დაეცვათ თავი გაცურებული და განრისხებული კლიენტებისგან. მოგვიანებით, შემოსავლების გაზრდის სურვილით, უკვე ძლევამოსილმა ბანდამ ბაზრებში წესრიგის დამყარებაც ითავა და მოვაჭრეებისგან ე.წ. ხარკის აკრეფა დაიწყო. სხვათაშორის, სწორედ ტეკიას რიგებში გაჩნდა პირველად ის იერარქიული სისტემა, რომლითაც დღემდე ხელმზღვანელობს თანამედროვე იაკუძა.

...

აღსანიშნავია, რომ სწორედ ბაკუტოს წევრებმა გაიკეთეს პირველად ტატუ და მოიხატეს მთელი ზურგი, რაც სხვათაშორის, დიდ ნებისყოფას მოითხოვდა, რადგან ამგვარი "ფერწერული ტილოს" შექმნას, სულ ცოტა 100 საათი მაინც სჭირდება. გარდა ამისა, სწორედ ბაკუტომ დაამკვიდრა თითის ფალანგის მოჭრის ტრადიციაც და რა თქმა უნდა, ისევ მათ - ბანქოს უბადლო მოთამაშეებმა დაარქვეს საკუთარ ბანდას ორიგინალური სახელი "იაკუძა".

* იაკუძას ცნობილი ლიდერები

იაკუძას პირველ მეთაურად ყოფილი სამურაი ბენძუინ ტობეი ითვლება (მე-17 საუკუნე), რომელმაც "კარიერა" ბანქოს თამაშით დაიწყო და სწრაფად გამდიდრდა, მერე კი, გავლენა მოიპოვა და "კოლეგების" პატივისცემაც დაიმსახურა. ერთ-ერთი ლეგენდის თანახმად ქალაქ ედოს მთავრობამ ტობეის გზების სარემონტო სამუშაოებზე პერსონალის დაქირავება შესთავაზა, მან კი, რიგითი მუშების ნაცვლად, სამუშაოებზე საკუთარი მევალეები გაუშვა და მათ მიერ გამომუშავებული თანხაც მიისაკუთრა.

კიდევ ერთ ცნობილ მეთაურად ითვლება, სისასტიკით სახელგანთქმული ძიროტო, რომელიც იაკუძას კლანს ქალაქ სიმიძუში ხელმძღვანელობდა მე-19 საუკუნის ბოლოს. ძიროტო პირველი იყო, ვინც ტერიტორიების გაყოფისას, ერთიანად გაანადგურა კონკურენტი კლანი მეზობელი ქალაქიდან. გარდა ამისა, მის ანგარიშზეა "ოქროს დელფინების" - კინსიატის ქურდობა ნაგოის უძველესი ციხე-სიმაგრის სახურავიდან.

კანონმორჩილი და სისასტიკით ცნობილი კრიმინალები - იაპონური მაფიის დღემდე უცნობი ფაქტები იხილეთ სიუჟეტში

მომზადებულია ფილმის სიუჟეტის მიხედვით

ნანა ჩხაიძე

მოსკოვში ხანძარს 4 ბავშვი ემსხვერპლა - "უყურადღებოდ იყვნენ დარჩენილი, რადგან დედა ან მეზობელთან იყო გასული, ან ნასვამს ეძინა"

პრინცს, რომელსაც ქალი გაუპატიურებას აბრალებს, ავსტრალიაში არავინ დახვდა

"პუტინის მზარეულის" საცეცები მსოფლიო სოციალურ ქსელებში - როგორ მუშაობს რუსული "ტროლების ფაბრიკა"