ქარიშხალ "ირმას" გამო, ფლორიდის შტატიდან 6,3 მილიონი ადამიანის ევაკუაცია გამოცხადდა

ქარიშხალი "ირმა" ფლორიდის შტატს უახლოვდება. არსებული ინფორმაციით, ქარიშხალი ამერიკის სანაპიროს დღეს დღის მეორე ნახევარში მიუახლოვდება.

ფლორიდის შტატის ხელისუფლებამ 6,3 მილიონი ადამიანის ევაკუირების განკარგულება გამოსცა. შტატის გუბერნატორის, რიკ სკოტის განცხადებით, მოსახლეობას რეკომენდაცია ეძლევა, დატოვონ თავიანთი სახლები და თავშესაფარში გადავიდნენ, ასევე, თავი შეიკავონ მგზავრობისგან.

ქარიშხალ "ირმას" სიმძლავრე მეოთხე კატეგორიის არის. მისი სიჩქარე 210 კმ/სთ-ია. სპეციალისტები მიიჩნევენ, რომ ქარიშხალი "ირმა" "ჰარვიზე" უფრო მძლავრია, რომელიც აგვისტოს ბოლოს ტეხასის შტატს დაატყდა თავს.