ისრაელი საერთაშორისო გამოძიების წინააღმდეგია

ისრაელი 1 ივნისს მომხდარ ინციდენტთან დაკავშირებით საერთაშორისო გამოძიების წინააღმდეგია.

ოფიციალურ თელ-ავივს არ სურს ღაზას ნაპირთან 1 ივნისს მომხდარი მოვლენების თაობაზე საერთაშორისო გამოძიების ჩატარება. "ესოშიეითიდ პრესის" ცნობით, საერთაშორისო გამოძიების ჩატარებას რიგი ქვეყნები, მათ შორის თურქეთი ითხოვს.

ისრაელის სპეცრაზმმა 1 ივნისს, ხმელთაშუა ზღვაში ექვსი გემისგან შემდგარი "თავისუფლების ფლოტილიის" დაკავების ოპერაცია ჩაატარა. ფლოტილია ღაზას სექტორისკენ მიემართებოდა. გემებზე მყოფთა უმეტესობა თურქეთის მოქალაქეები იყვნენ. სპეცოპერაციის შედეგად 19 ადამიანი დაიღუპა, ისრაელმა მხოლოდ ცხრა ადამიანის დაღუპვა დაადასტურა.

ისრაელის სამხედროებმა ღაზას სექტორში შესვლის უფლება არც ირლანდიურ გემს ”რეიჩელ კორს” მისცეს.