გერმანიის დიდ ქალაქებში პოლიცია და სამხედროები პატრულირებენ

გერმანიაში მიმდინარე ბუნდესტაგის არჩევნების გამო, ქვეყნის დიდ ქალაქებში უსაფრთხოების ზომები გამკაცრდა. ქუჩებში პოლიციასთან ერთად სამხედროები პატრულირებენ. დედაქალაქ ბერლინში 1500-ზე მეტი სამართალდამცველია მობილიზებული, რომლებიც არჩევნების მშვიდობიან გარემოში ჩატარებას უზრუნველყოფენ.

არჩევნების პარალელურად ბერლინში ყოველწლიური მარათონი იმართება, რომელშიც ათასობით მსურველი მონაწილეობს. ადგილობრივი ხელისუფლების ცნობით, მარათონის გამო ამომრჩევლებს 30-მდე საარჩევნო უბანზე მისვლა გაუჭირდებათ.

გერმანიაში უსაფრთხოების ზომები მას შემდეგ გამკაცრდა, რაც ევროპის მასშტაბით არაერთი ტერაქტი განხორციელდა. მათ შორის 2016 წლის დეკემბერში, ბერლინში საახალწლო ბაზრობაზე სატვირთო შევარდა, რასაც 12 ადამიანი ემსხვერპლა, 50-მდე კი დაშავდა.