ქალური გარჩევები საქართველოს პარლამენტში - დაპირისპირებული მხარეების პირველი კომენტარები მწვავე კონფლიქტზე

ქალური გარჩევები საქართველოს პარლამენტში - დაპირისპირებული მხარეების პირველი კომენტარები მწვავე კონფლიქტზე

სახალხო დამცველის ანგარიშის გაცნობას პარლამენტში დაპირისპირება მოჰყვა. ეკა ბესელიამ ჩიორა თაქთაქიშვილს შენიშვნა მისცა, რასაც დეპუტატებს შორის დაპირისპირება მოჰყვა, დავა პირად შეურაცხყოფაში გადაიზარდა. ჩიორა თაქთაქიშვილმა სხდომა პროტესტის ნიშნად დატოვა და ეკა ბესელიას მიკროფონიც გამოურთო. ეკა ბესელიას დაპირისპირება "ნაციონალური მოძრაობის" დეპუტატ ქალბატონებთან ხშირად გადადის პირად შეურაცხყოფაში. პარლამენტში მომხდარ დაპირისპირებას უკვე გამოეხმაურნენ დეპუტატები.

"ნაციონალური მოძრაობის" წევრი მარიამ საჯაია მიიჩნევს, რომ ბესელიას ადგილი პარლამენტში არ არის. "უფრო მარტივად - ეკა ბესელია არ უნდა იყოს პოლიტიკაში და მით უფრო, არ უნდა იყოს ადამიანის უფლებათა დაცვის კომიტეტის თავმჯდომარე, რადგან იგი ვიწროპოლიტიკური შეხედულებიდან (თუ სტერეოტიპიდან) გამომდინარე აკეთებს შეურცხმყოფელ განცხადებას კოლეგის მიმართ, არღვევს უდანაშაულობის პრეზუმფციას პოლიტიკური პარტიის წევრთა მიმართ და აქვს დისკრიმინაციული მოსაზრება ფსიქიკური აშლილობის მქონე ადამიანებზე", - წერს საჯაია "ფეისბუქის გვერდზე.

თავად ჩიორა თაქთაქიშვილი კი ამბობს, რომ ბესელიას ადამიანის უფლებების დაცვაზე წარმოდგენაც არ აქვს. "ახლა გავიგე მედიიდან, რომ ეკა ბესელიამ სხვა დანარჩენთან ერთად, მიწოდა ფქსიქიატრიულში წასაყვანი. სწორედ ამას ვგულისხმობ, როცა ვამბობ, რომ მას წარმოდგენაც კი არა აქვს ადამიანის უფლებათა დაცვის სტანდარტებზე", - წერს თაქთაქიშვილი "ფეისბუქზე".

არავინ იცის, რამ გააღიზიანა, მაგრამ ეკა ბესელიას ფსიქოს ითხოვს ანი ნადარეიშვილი. "გადავწყვიტე საქართველოს პარლამენტს მივმართო წერილით, გამომიგზავნოს ეკა ბესელიას ფსიქო, ვინაიდან დიდი ხნის განმავლობაში ვაკვირდები მის ქცევებს, და ეჭვი მეპარება, რომ ეს ადამიანი იყოს ჯანმრთელი ფსიქიურად და თუ ასეთი დოკუმენტი მოეპოვება პარლამენტს, მაშინ ეჭვქვეშ ვაყენებ და ვიწყებ იმ ექიმის "ბეკგრაუნდის" შესწავლას, ვინც ეს საბუთი გასცა!",  - წერს ნადარეიშვილი პირად გვერდზე.

Ambebi.ge ეკა ბესელიას დაუკავშირდა:

- ეს ფასეულობათა და მსოფლმხედველობრივი დაპირისპირებაა და კრიზისი იმ პოლიტიკური ჯგუფის მხარდამჭერთან, რომელიც ამართლებდა ძალადობას, წამებას, მკვლელობას და გაუპატიურებას. ჩიორასნაირი ადამიანები ვის უნდა უყენებდნენ ბრალდებებს? ეს ჩვენ გვაქვს მათთან ბრალდებები. სახალხო დამცველის ანგარიშს არ კითხულობდნენ და წამების ანგარიშს ცნობად იღებდნენ. ასეთ სტანდარტებზე უნდა საუბრობდეს დღეს ჩიორა? მას მოსწონს მერაბიშვილის, ადეიშვილის და ახალაიას სტანდარტი, რომელიც ადამიანების გვამების მოთხოვნაზე და წამების ჩვენებების მიღებაზე გადიოდა. ჩიორას ხშირად აქვს დეპუტატისთვის შეუთავსებელი ქცევები და რაც დღეს გააკეთა, იმსახურებს დისციპლინურ პასუხისმგებლობას, ვაპირებ დავაყენო ეს საკითხი.

- თქვენი და "ნაციონალური მოძრაობის" დეპუტატი ქალების დაპირისპირება ხშირად გადადის პიროვნულ შურაცხყოფაზე, რა აღიზიანებთ მათ და რამდენად სწორად მიგაჩნიათ სხდომაზე მსგავსი ტიპის განცხადებების გაკეთება?

- ეს მათი მენტალობის და ქცევის კულტურის მასშტაბის მაჩვენებელია. მე მაქვს თმენის მაღალი სტანდარტი და რკინის ნებისყოფა, მაგრამ არასოდეს  მივიღებ მათ მორალისტურ მონოლოგებს. როცა ხელისუფლებაში ყოფნის დროს ნებივრობდნენ უზრუნველად, მე ქუჩაში ვიდექი უსამართლობის წინააღმდეგ და ვიცავდი უამრავ უდანაშაულო ადამიანს მათი ძალადობისგან. 2 წელი მძევლად ჰყავდათ ჩემი ოჯახის წევრები, ჩემი სკოლის მოსწავლე შვილი ტერორში იყო, ეს ხალხი მე მორალზე ვერ დამელაპარაკება, ყოველთვის პასუხს მიიღებს. ვერასდროს გაბედავდნენ, რეკომენდაცია მიეცათ მთავრობისთვს და სამინისტროებისთვის, დღეს სწორედ ასეთ რეკომენდაციებს ვიხილავდით და თურმე ეს არ მოეწონა ჩიორას.

- მართლა მიგაჩნიათ, რომ ფსიქიატრიულში წასაყვანია ჩორა თაქთაქიშვილი თუ ემოციურ ფონზე თქვით?

- ასეთი ქცევა ადექვატურობის მაჩვენებელი არაა.

- როგორ შეაფასებთ პარლამენტში მომხდარ დაპირისპირებას?

ირმა ნადირაშვილი:

- ჩვენ ზოგადად მივიღებთ ამ თემაზე გადაწყვეტილებას. ცუდია, როცა კომიტეტის თავმჯდომარე ვერ ახერხებს ნორმალური სამუშაო ატმოსფეროს შექმნას. პირველი შემთხვევა არ არის, როცა ქართულ ოცნებიდან ჩვენ გვეძახიან ხან მკვლელებს, შეურაცხყოფას გვაყენებენ, მაგრამ რაც შეეხება საქმეს, მივმართავთ საპროცედურო საკითხთა კომიტეტს, განიხილოს ეს საქციელი, რომელიც არანაირად არ ჯდება არც კომიტეტის თავმჯდომარის და არც უფლებადამცველის ქცევის ნორმებში. ამიტომ მოვითხოვთ სანქციები გატარდეს. როცა ხარ კომიტეტის თავმჯდომარე, ადამიანს არ უნდა მიაყენო პირადი შეურაცხყოფა.

- თქვენი აზრით, რატომ გადადის მისი და თქვენი პარტიის დეპუტატი ქალების დაპირისპირება პირად შეურაცხყოფაში?

- ეს ბესელიას უნდა ჰკითხოთ.

დაბოლოს, მომხდარს ეხმიანება თეა თუთბერიძეც, რომელიც ბესელია-თაქთაქიშვილის დაპირისპირებაზე შემდეგ ტექსტს აქვეყნებს:

"ეკა ბესელია, უკაცრავად საზოგადოებასთან, მაგრამ შენ რომ ჩიორა თაქთაქიშვილზე კი არა, საერთოდ ვინმეზე იტყვი ფსიქიატრიულშია წასაყვანიო, რატომ მიწა არ გასკდება და ცა არ ჩამოიქცევა!

ფსიქიატრიულში წასაყვანიც ხარ და აღარც არავინ მიგიღებს იმ ფსიქიატრიულში, რადგან ფსიქიატრიული თავზედაც რომ დაგადგან, შენ მაინც ვერაფერი გიშველის აწი. შენ და შენისთანა კრიმინალური მენტალიტეტის მატარებელ არსებებს, მართლა რომ რაღაც ჰგონიათ დღეს თავი, აი ეგ არის სასაცილო, მაგრამ ამ ქვეყნისთვის კი ტრაგედიაა, შენ რომ დღეს გქვია ამ ქვეყნის დეპუტატი და ადამიანის უფლებათა კომიტეტის თავმჯდომარე.

პატივისცემით;

თეა თუთბერიძე".

თამარ ბოჭორიშვილი, Ambebi.ge

იხილეთ ვიდეო

LIVE: გია ხუხაშვილი "ნიუსრუმიდან"

"ანტიგმირი უნდა დამალო" -  გია ხუხაშვილი  პარლამენტიდან ვანო ზარდიაშვილის წასვლაზე

უკრაინის პროკურატურამ მიხეილ სააკაშვილის მიმართვაზე საქმე აღძრა