ზურაბ აბაშიძე - ვცდილობთ, ჩვენი ევროპული პოლიტიკა წავმართოთ ისე, რომ რუსეთის მხრიდან წინააღმდეგობა არ შეგვხვდეს

ყველანაირად ვცდილობთ, ჩვენი ევროპული პოლიტიკა წავმართოთ ისე, რომ რუსეთის მხრიდან არანაირი განსაკუთრებული წინააღმდეგობა არ შეგვხვდეს, - ამის შესახებ ჟურნალისტებს რუსეთთან ურთიერთობის საკითხებში პრემიერ-მინისტრის მრჩეველმა ზურაბ აბაშიძემ განუცხადა, რომელიც ამერიკის სენატში გუშინ მიღებული რეზოლუციის გამო მოსკოვის გაღიზიანებას არ ელოდება.

რაც შეეხება ზოგადად აღნიშნულ დოკუმენტს, აბაშიძის შეფასებით, ეს ჩვენი ქვეყნის უსაფრთხოების გაძლიერების თვალსაზრისით სერიოზული წინგადადგმული ნაბიჯია. "ამერიკის შეერთებული შტატები ჩვენი სტრატეგიული პარტნიორია. მასთან უაღრესად კონსტრუქციული, მჭიდრო თანამშრომლობა გვაქვს. ეს საკითხი კარგა ხანია დღის წესრიგში დგას. მე ვფიქრობ, რომ ეს სერიოზული წინგადადგმული ნაბიჯი იქნება ჩვენი ქვეყნის უსაფრთხოების გაძლიერების თვალსაზრისით", - განაცხადა აბაშიძემ.

აშშ-ის სენატის საგარეო ურთიერთობათა კომიტეტმა დაამტკიცა კანონპროექტი, რომელიც ნატო-ს არაწევრ ქვეყნებს - საქართველოს, მოლდოვასა და უკრაინას აშშ-ის ნომერ პირველ პარტნიორად აღიარებს.

"ინტერპრესნიუსი"