მიხეილ სააკაშვილის საბანკო ანგარიშები დააყადაღეს

მიხეილ სააკაშვლის ადვოკატის ოთარ კახიძის ინფორმაციით, ყოფილ პრეზიდენტს საქართველოში არსებული საბანკო ანგარიშები დაუყადაღეს.

აღნიშნულ ინფორმაციას კახიძე "ფეისბუქის" საკუთარ გვერდზე ავრცელებს.

"ბატონი ბიძინას ლოცვა-კურთხევით, დაყადაღებულია მიშა სააკაშვილის საბანკო ანგარიშები. ოღონდ, პროკურატურას დაეზარა იმის გარკვევა, თუ რომელი ბანკის მომსახურებით სარგებლობდა ექს-პრეზიდენტი და მოითხოვა ყველა ბანკში ყადაღის დადება. აი ასე, თუკი სადმე რამე აქვს. სასამართლომაც დაარტყა ბეჭედი. ამ ნაკვეთებზე რაღატო იწვალეს, არ ვიცი. დაეყადაღებინათ ზოგადად - "ყველაფერი"

მადლობა იმ ბრძენ კაცს, კანონის უზენაესობა რომ დაამკვიდრა", - წერს მიხეილ სააკაშვილის ადვოკატი.

ამასთან, პროკურატურის პრესსამსახურის უფროსის ნათია სუხიაშვილის ინფორმაციით, ყველაფერი რაც მიხეილ სააკაშვილს დაუყადაღდა სია უკვე გამოქვეყნებულია უწყების ვებ-გვერდზე.

"სხვა ინფორმაცია არ მაქვს", - განაცხადა სუხიაშვილმა.

გუშინ ცნობილი გახდა, რომ მიხეილ სააკაშვილის და მისი ოჯახის წევრების ქონება დაყადაღებულია.