"ივანიშვილსა და ღარიბაშვილს შორის ნდობის ხარისხი შემცირებულია" - პრემიერს პირადი გარემოცვა ხელიდან ეცლება?

"ივანიშვილსა და ღარიბაშვილს შორის ნდობის ხარისხი შემცირებულია" - პრემიერს პირადი გარემოცვა ხელიდან ეცლება?

პრემიერს პირადი გარემოცვა ხელიდან ეცლება? - ეს კითხვა აქტუალური კიდევ ერთხელ მას შემდეგ გახდა, რაც ალექსანდრე ჭიკაიძემ თანამდებობა დატოვა და შინაგან საქმეთა მინისტრის პოსტი მისმა პირველმა მოადგილემ, ბიძინა ივანიშვილის დაცვის ყოფილმა წევრმა, ვახტანგ გომელაურმა დაიკავა.

ცნობილია, რომ თავის დროზე, ალექსანდრე ჭიკაიძის გამინისტრება ირაკლი ღარიბაშვილის სიმამრის, თამაზ თამაზაშვილის რეკომენდაციით გადაწყდა - ჭიკაიძისა და თამაზაშვილის ოჯახებს ერთმანეთთან ნათელმირონი აკავშირებთ. თუ გასული წლის მიწურულს, ექვს დღეში განხორციელებულ ცხრა საკადრო ცვლილებას გავიხსენებთ და შსს-ში მიმდინარე ცვლილებების მიხედვითაც ვიმსჯელებთ, ზემოთ დასმულ კითხვაზე პასუხის გაცემაც არ გაგვიჭირდება - დღევანდელი მდგომარეობით, ხელისუფლებაში ე.წ. კახური გავლენები შესუსტებულია! თვალსაჩინოებისთვის: შსს სახელმწიფო უსაფრთხოების სამსახურის უფროსმა მალხაზ ჩიკვილაძემ, მთავრობის ადმინისტრაციის რეგიონებსა და ადგილობრივ თვითმმართველობებთან ურთიერთობის დეპარტამენტის უფროსმა აკაკი ჩხენკელმა, ინფრასტრუქტურის მინისტრის მოადგილე ზურაბ კოპაძემ, შინაგან საქმეთა მინისტრის პირველმა მოადგილე გიორგი ზედელაშვილმა, შსს-ს გენერალური ინსპექციის უფროსმა ირაკლი სამყურაშვილმა, ეკონომიკური საბჭოს მდივანმა რომან ჩხენკელმა, გურიის გუბერნატორმა გიორგი ჩხაიძემ, ფინანსთა სამინისტროს შემოსავლების სამსახურის უფროსმა ირაკლი გვარამაძემ, "ქართული ოცნება - დემოკრატიული საქართველოს" აღმასრულებელმა მდივნმა ზვიად ჯანყარაშვილმა და შინაგან საქმეთა მინისტრმა ალექსანდრე ჭიკაიძემ თანამდებობა დატოვეს.

პარალელურად, ინფრასტრუქტურის მინისტრის მოადგილედ ნოდარ ჯავახიშვილი დაინიშნა, რომელიც ბიძინა ივანიშვილის "ქართუ ბანკის" გენერალური დირექტორი იყო, ხოლო სახელმწიფო დაცვის სამსახურის უფროსად ყოფილი პრემიერის დაცვის ყოფილი უფროსი ანზორ ჩუბინიძე დაბრუნდა...

იმასაც შეგახსენებთ, რომ გავრცელებული ინფორმაციით, ზვიად ჯანყარაშვილის გამო ირაკლი ღარიბაშვილსა და კახა კალაძეს შორის ურთიერთობა საკმაოდ დაიძაბა და პრემიერს დღეს სათანადო გავლენა არც ენერგეტიკის მინისტრზე გააჩნია. ერთი სიტყვით ირაკლი ღარიბაშვილი უახლოესი გარემოცვის გარეშე დარჩა.

ვის აქვს დღეს ქვეყანაში ირაკლი ღარიბაშვილზე მეტი გავლენა და მისი პირადი კადრების თანამდებობიდან გათავისუფლების ბერკეტი? პასუხი ამ კითხვაზეც მარტივია - რა თქმა უნდა, ბიძინა ივანიშვილს! ექსპერტებიც მიიჩნევენ, რომ საკადრო ცვლილებების სერია ტენდერებთან და ნეპოტიზმთან დაკავშირებით არსებული პრობლემების გამო ყოფილი პრემიერის განრისხების შედეგია. სახელისუფლო კულუარებში უკვე არც იმას გამორიცხავენ, რომ საკადრო ცვლილებებს მალე მოქმედი პრემიერ-მინისტრიც გადაყვება.

პოლიტოლოგი სოსო ცისკარიშივილი მიიჩნევს, რომ ხელისუფლებაში საკადრო ცვლილებების სერია სწორედ ბიძინა ივანიშვილის გადაწყვეტილების შედეგია:

"ბიძინა ივანიშვილისა და ირაკლი ღარიბაშვილის კადრების ერთმანეთისგან განსხვავება მიჭირს. ჯერჯერობით, ეს ერთი გუნდია, მაგრამ ისიც ფაქტია, მათ შორის, განსხვავებული აზრის რაოდენობა მატულობს - ბიძინა ივანიშვილსა და ირაკლი ღარიბაშვილს შორის ნდობის ხარისხი შემცირებულია. რაც შეეხება ცვლილებებს, როგორც თავის დროზე, თანამდებობებზე ირაკლი ღარიბაშვილის გარემოცვა თუ სხვა კადრები ბიძინა ივანიშვილის გადაწყვეტილებით დაინიშნენ, ასევე წარმატებით გაქრნენ ისინი დაკავებული პოსტებიდან - თანამდეობებზე მათ ყოფნა-არყოფნაში კი, წვლილი ირაკლი ღარიბაშვილს არ მიუძღვის. სამწუხაროდ, ასეთი რეალობა მინისტრების დამოუკიდებლობას აკნინებს. რაც შეეხება ირაკლი ღარიბაშვილს, როგორც კი ბიძინა ივანიშვილის თვალსაწიერში მოქმედ პრემიერ-მინისტრზე ერთგული პიროვნება გამოჩნდება, დიდი ალბათობით, ივანიშვილი ღარიბაშვილს შეცვლის. დღეს მხოლოდ ერთგულებითაა შესაძლებელი თანამდებობებზე დასანიშნი კანდიდატების მოკლე სიაში მოხვედრა", - ამბობს სოსო ცისკარიშვილი.

რუსუდან შელია

AMBEBI.GE

LIVE: გია ხუხაშვილი "ნიუსრუმიდან"

"ანტიგმირი უნდა დამალო" -  გია ხუხაშვილი  პარლამენტიდან ვანო ზარდიაშვილის წასვლაზე

უკრაინის პროკურატურამ მიხეილ სააკაშვილის მიმართვაზე საქმე აღძრა