ვინ არის და რას პირდება თბილისს პრორუსი ახალგაზრდა, რომელმაც დედაქალაქში "გეორგიევსკის ლენტი" "ააფრიალა"

ვინ არის და რას პირდება თბილისს პრორუსი ახალგაზრდა, რომელმაც დედაქალაქში "გეორგიევსკის ლენტი" "ააფრიალა"

თბილისში, "ჯეოსელისა" და "დიჰაბსის" ერთობლივი პროექტისთვის განკუთვნილ ბანერზე განთავსებულმა პოსტერმა და მასზე თანდართულმა გზავნილებმა საზოგადოება აღაშფოთა. ბანერზე გამოსახული იყო "გეორგიევსკის ლენტა" და რუსული წარწერები: Народная акция "Георгиевская ленточка", Помню! Я горжусь! - ანუ სახალხო აქცია "გეორგიევსკის ლენტი; მახსოვს! ვამაყობ!"

საზოგადოების უარყოფითი რეაქციის შემდეგ კომპანია "ჯეოსელმა" ბოდიში მოიხადა და  განაცხადა, რომ არ ეთანხმება გამოქვეყნებული პოსტერის შინაარსს[მეტი].

პირი, რომელმაც "ჯეოსელისა" და "დიჰაბსის" პროექტის საშუალებით დედაქალაქის ცენტრალურ ქუჩაზე ბანერი გამოაქვეყნა, "ევრაზიის ინსტიტუტის საბჭოს" წევრი ირაკლი ყიფიანია. რა დატვირთვის მატარებელია გამოქვეყნებული პოსტერი და რისი თქმა უნდოდა მისი გამოქვეყნებით ავტორს, ამ კითხვებზე მას Ambebi.ge ესაუბრა.

- ირაკლი, რა იყო თქვენი მიზანი და რას იტყვით გამოქვეყნებული პოსტერის შინაარსზე?

- ამ კამპანიის შესახებ სოციალური ქსელებიდან გავიგე და გადავწყვიტე, რომ ჩემთვის მაქსიმალურად პროდუქტიულად გამომეყენებინა ეს შესაძლებლობა, ვინაიდან სააკაშვილის პერიოდისგან განსხვავებით, დღეს დემოკრატიულ ქვეყანაში ვცხოვრობთ  და არავინ ზღუდავს სიტყვისა და გამოხატვის თავისუფლებას. ამიტომაც ვისარგებლე ამ მომენტით. მოგეხსენებათ, 70 წელი გადის მეორე მსოფლიო ომში გამარჯვებიდან, რომლის გმირი ჩემი დიდი ბაბუაც იყო, და ამ პოსტერზე წერია - "მე მახსოვს", "მე ვამაყობ", და კი, - მე ვამაყობ, რომ ჩემი დიდი ბაბუა იყო იმ დიდი ბოროტების წინააღმდეგ ბრძოლის გამარჯვებული, რასაც ფაშიზმის დამარცხება ჰქვია, და რუსულად დავწერე იმიტომ, რომ ამ გზავნილით მიმეწვდინა ხმა პოსტსაბჭოთა ახალგაზრდებისთვისაც...

- რამდენად კარგად იცნობთ სიმბოლიკას, რომელიც თქენ მიერ გამოქვეყნებულ პოსტერზეა გამოსახული.

- ძალიან კარგად ვიცნობ. მე მაქვს სახლში მედალიონი, რომელსაც დაყოლილი აქვს გეორგიევსკის ლენტის მცირე მონაკვეთი..

- ლენტის ფერები - შავი და მოყვითალო, ერთი განმარტებით, კვამლსა და ცეცხლის ალს აღნიშნავს. ხოლო მეორე,  ჰერალდიკოსი მეცნიერების დასაბუთებული ვერსიით, რუსეთის იმპერიის ღერბის ფერებს - შავი არწივი ოქროს ფონზე.

- არა, ეს დიდი აბსურდი და ყურით მოთრეული თემაა..

- რაც შეეხება საზოგადოების მძაფრ რეაქციებს, შესაძლოა, ეს მღელვარება საზოგადოებაში იმანაც გამოიწვია, რომ თქვენ ხართ გაცხადებულად პრორუსული პოლიტიკის მიმდევარი მოძრაობა... და ეს სიმბოლიკა, რომელიც გამოსახეთ ბანერზე, 2014 წელს კიევში, აქცია "ანტიმაიდანზე" "ბერკუტის" წარმომადგენლებმაც ააფრიალეს... არ გიქმნით ეს რაიმე უხერხულობას?

- არ მიქმნის და რაც შეეხება ნეგატიურ გამოხმაურებებს, ჩვენს მიმართ დაწერილი უარყოფითი კომენტარების ძირითადი ავტორები "ნაციონალური მოძრაობის" პარტიული წევრები და მხარდამჭერები არიან...

- ირაკლი, ვერ დაგეთანხმებით, რადგან თქვენც, ისევე როგორც მე, ძალიან აქტიური მომხმარებელი ხართ "ფეისბუქის" და ალბათ ნახავდით, რომ ძალიან ბევრი მოქალაქე აღაშფოთა ამ პოსტერმა და შესაბამისად, ეს არ არის ის შემთხვევა, როდესაც რაიმე პარტიული პროტესტი მოჰყვა თქვენს ქმედებას, ეს საზოგადოებრივი რეაქცია უფრო იყო, რის შედეგადაც კომპანია "ჯეოსელს" საჯაროდ ბოდიშის მოხდაც კი მოუწია...

- კიდევ ვიმეორებ, ნეგატიური კომენტარების ავტორთა  95 პროცენტი არიან "ნაციონალური მოძრაობის" პარტიული წევრები და მათი სატელიტები... ძალიან ბევრი არის შეცდომაში შეყვანილი მოქალაქე, რომელსაც ჰგონია, რომ ეს არის ფაშისტური სიმბოლო, რაც განათლების სიმწირეზე მიუთითებს....

- თქვენ Facebook-ზე დაწერეთ, რომ თბილისს მეტ გეორგიევსკის ლენტას პირდებით... რას გულისხმობთ?

- რატომ არ შეიძლება ჩატარდეს თბილისში სახალხო აქცია - "გეორგიევსკის ლენტა ყველას"?! მეტად ვერ დავკონკრეტდები, მოდით ინტრიგად დავტოვოთ, რადგან მოწყენილობა სუფევს ქართულ პოლიტიკაში... მოდით, ახალგაზრდების ერთ ჯგუფს დაგვიტოვეთ საშუალება, რომ ინტრიგა შემოვიტანოთ ქართულ საზოგადოებაში...

გიორგი გიორგაშვილი

AMBEBI.GE

LIVE: გია ხუხაშვილი "ნიუსრუმიდან"

"ანტიგმირი უნდა დამალო" -  გია ხუხაშვილი  პარლამენტიდან ვანო ზარდიაშვილის წასვლაზე

უკრაინის პროკურატურამ მიხეილ სააკაშვილის მიმართვაზე საქმე აღძრა