გოკა გაბაშვილი - პირველად ბოლო 18 წლის განმავლობაში ბიუჯეტის სეკვესტრისთვის ხმის მიცემა მოგიწევთ

გოკა გაბაშვილი - პირველად ბოლო 18 წლის განმავლობაში ბიუჯეტის სეკვესტრისთვის ხმის მიცემა მოგიწევთ

თქვენ ამ პარლამენტში, ამ ღილაკებით, რომელიც წინ გაქვთ, მოგიწევთ პირველად ბოლო 18 წლის განმავლობაში, ბიუჯეტის სეკვესტრისთვის ხმის მიცემა, - ამის შესახებ ფრაქცია "ნაციონალური მოძრაობის" თავმჯდომარემ, გოკა გაბაშვილმა პარლამეტის პლენარულ სხდომაზე სიტყვით გამოსვლისას განაცხადა.

დეპუტატმა ქვეყნის ეკონომიკურ მდგომარეობაზე ისაუბრა და მთავრობას ამ კუთხით ქმედითი ნაბიჯების გადადგმისკენ მოუწოდა. "სწორედ იმ ტრაგიკული შეცდომით, რაც იყო ქაღალდზე ბიუჯეტის ვითომ შესრულება, 2014 წლის ბოლოს, დეკემბერში, ბიუჯეტის შესრულება იყო ტრაგიკული შეცდომა, ჩვენ გეუბნებოდით, რომ თუ ქაღალდზე გაიწერება ხარჯები, თუ ჭარბი რაოდენობით ბაზარზე გამოიყრება ლარი, რომელიც გამოიყრება ტყუილად, იმიტომ, რომ ვერც ერთი პროექტი 2014 წლის დეკემბერში ვერ შესრულდებოდა, სწორედ ეს დაიწყებდა იმ სპირალს, რომელიც თვალნათლივ გამოაჩენდა ეკონომიკურ პრობლემებს. დღეს ნახევარ მილიონ ოჯახზე მეტს გაუჭირდა ცხოვრება, ნახევარ მილიონ ოჯახზე მეტი დღეს ვერ იხდის თავის კრედიტებს, ნაწილს ძალიან უჭირს და რეკორდული მაჩვენებელია ვერ გადახდების. აქ გამოდიან და გვეუბნებიან, რომ ყველაფერი კარგად არის, რომ ყველაფერი მშვენივრად არის. შეიძლება იმათთვის, ვისაც ათასები და ათიათასები აქვთ ანგარიშზე და ვარდისფრად ხედავს ყველაფერს, მაგრამ კონკრეტულ ადამიანებს უჭირთ ამ ქვეყანაში ცხოვრება, ისინი ღარიბდებიან", - აღნიშნა გოკა გაბაშვილმა.

დეპუტატის შეფასებით, დღეს საქართველოში სიღარიბე იზრდება და ამაზე არსებობს საერთაშორისო დასკვნები. "ეს არის ეკონომიკის კრახი, რაც საქართველოში ტრიალებს. ჩვენ 50 წელი დაგვჭირდება იმისთვის, რომ ევროპული ქვეყნების სტანდარტებს მივაღწიოთ. ამ პირობებში გამოდის კმაყოფილი მინისტრი ხადური და ამბობს, რომ არანაირი შოკი არ არის, არის მცირე შოკუნიები. ეს უტიფრობა, ეს დაცინვა ხალხის საუბარი იმაზე ივანიშვილის მხრიდან, რომ ბანკირები უნდა იქირაოთ და მრჩევლები და უნდა ისწავლოთ დაბანდება და საუბარი შოკუნიებზე, განცხადებაზე იმაზე, რომ კრიზისი არ არის და ეს კიდევ უფრო ართულებს თქვენ მდგომარეობას და თუ გგონიათ სიტყვიერ კამათში სიტყვიერ გადალაპარაკებაში, ამაში არის საქმე და ამაში უნდა გაიმარჯვოთ და თუ ამ დარბაზში რამეს წარმოაჩნეთ ვარდისფრად და ამას ხალხი დაიჯერებს, ასე არ იქნება. ეს არის ერთი მოთამაშის ბრალი, ეს არის საქართველოს მთავრობა, რომელსაც მართავს ივანიშვილი", - განაცხადა გაბაშვილმა.

მისი თქმით, ქვეყნიდან ინვესტორები გარბიან და ტოვებენ თავის ბიზნესებს. "მოგიყვანთ ერთ მაგალითს. მაგალითად თენგიზ იაკობაშვილი, რომელსაც 3 მილიონი ჩადებული აქვს სამშენებლო მასალების წარმოებაში და 25-ის ჩადებას კიდევ აპირებდა, იუსტიციის მინისტრის სურვილით აუკრძალეს მას ქვეყანაში შემოსვლა და მან დატოვა თავის ბიზნესი და წავიდა. კონკრეტული მავნებლობა და უნიათობა ეს თქვენი ყოველდღიურობაა. დღეს მარგველაშვილი საუბრობდა "დიუნგ ბიზნესის" მნიშვნელობაზე, ღრმა და ყოვლისმომცველ ხელშეკრულებაზე, ეკონომიკის დივერსიფიცირებაზე, აღნიშნა ამერიკის ხელშეკრულების მნიშვნელობა, თავისუფალ ვაჭრობაზე, კი ბატონო ეს ყველაფერი ის არის რასაც 2 წლია განმავლობაში გეუბნებით", - აღნიშნა გოკა გაბაშვილმა.

დეპუტატის ინფორმაციით, ბიუჯეტი თებერვალში არის დეფიციტური, 118 მილიონი ლარით. "თქვენ ამ პარლამენტში ამ ღილაკებით, რომელიც წინ გაქვთ მოგიწევთ პირველად ბოლო 18 წლის განმავლობაში ბიუჯეტის სეკვესტრისთვის ხმის მიცემა. არა იმიტომ, რომ ხარჯებს დაზოგავთ, არამედ იმიტომ, რომ ფული არ გაქვთ. 3 მილიარდი ახალი ვალი აიღეთ. მთავრობის ტრიბუნა დღეს პასუხების არარსებობის გამო არის თავისუფალი. მთავრობის დამცინავი ტონი დისტანციას ზრდის მთავრობასა და ხალხს შორის", - აღნიშნა ფრაქცია "ნაციონალური მოძრაობის" თავმჯდომარემ.

"ინტერპრესნიუსი"

"ანტიგმირი უნდა დამალო" -  გია ხუხაშვილი  პარლამენტიდან ვანო ზარდიაშვილის წასვლაზე

უკრაინის პროკურატურამ მიხეილ სააკაშვილის მიმართვაზე საქმე აღძრა

ვანო ზარდიაშვილი პარლამენტს ტოვებს - "ჩემ უკან დგას ჩემი ოჯახი და მცირეწლოვანი შვილები..."