ირაკლი ალასანია - გადასაწყვეტია მთავარი საკითხი, დატოვებს თუ არა ივანიშვილის პირად პატიმრებს სასამართლო წინასწარ პატიმრობაში

"თავისუფალი დემოკრატების" ლიდერის, ირაკლი ალასანიას განცხადებით, სასამართლო განხილვებისას ე. წ. კაბელების საქმე ხუთი პირის სრულად გამართლებით რომ დასრულდება, მას ეჭვი არ ეპარება. ამის შესახებ ალასანიამ საქალაქო სასამართლოში ე.წ. კაბელების საქმეზე ბრალდებულების წინასასამართლო სხდომის დაწყებამდე განაცხადა.

"თავისუფალი დემოკრატების" ლიდერი სასამართლო სხდომას დაესწრება. "დღეს მთავარი საკითხია გადასაწყვეტი - ივანიშვილის პირად პატიმრებს წინასწარ პატიმრობაში დატოვებს თუ არა სასამართლო, ეს არის მნიშვნელოვანი, რატომ არის ეს ხუთი ადამიანი წინასწარ პატიმრობაში ამდენ ხანს, აბსოლუტურად უსაფუძვლოდ, როდესაც ის საექსპერტო დასკვნაც კი, რომელიც პროკურატურას საფუძვლად ჰქონდა მათი დაკავების, თვითონ უარყო საგამოძიებო უწყებამ. პრაქტიკულად ახალი ექსპერტიზა დანიშნა", - განაცხადა ირაკლი ალასანიამ. მისი თქმით, დღეს გამოიკვეთება, რამდენად აქვს შესაძლებლობა დამოუკიდებელი გადაწყვეტილება მიიღოს სასამართლომ.

"მე დიდი იმედი მაქვს და მწამს სასამართლოს დამოუკიდებლობის. მგონია, რომ გადაწყვეტილება უნდა იყოს სამართლიანი", - განაცხადა ირაკლი ალასანიამ. ე.წ. კაბელების საქმეზე 5 პირის მიმართ გამოძიება დასრულებულია. მათ საქმეზე თავდაცვის მინისტრობის დროს ირაკლი ალასანიას 2 მოადგილე, ალექსი ბატიაშვილი და ზაზა ბროლაძე დაიკითხნენ.

მთავარმა პროკურატურამ თავდაცვის სამინისტროს მაღალჩინოსნები გასული წლის ნოემბერში დააკავა. მათ აღკვეთის ღონისძიებად პატიმრობა შეეფარდათ. უწყების ინფორმაციით, მოქმედ თანამდებობის პირებს ბრალად ედებათ სახელმწიფო ბიუჯეტის კუთვნილი 4 102 872 ლარის გაფლანგვა, კომპანია "სილქნეტის" სასარგებლოდ.

დაკავებული არიან საქართველოს თავდაცვის სამინისტროს სახელმწიფო შესყიდვების დეპარტამენტის ყოფილი უფროსი გიზო ღლონტი; საქართველოს შეიარაღებული ძალების გაერთიანებული შტაბის ჟ-6 კავშირგაბმულობისა და ინფორმაციული ტექნოლოგიების დეპარტამენტის უფროსი ნუგზარ კაიშაური; საქართველოს თავდაცვის სამინისტროს სახელმწიფო შესყიდვების დეპარტამენტის სამმართველოს უფროსი გიორგი ლობჟანიძე; საქართველოს თავდაცვის სამინისტროს სახელმწიფო შესყიდვების დეპარტამენტის მთავარი სპეციალისტი არჩილ ალავიძე და საქართველოს შეიარაღებული ძალების გაერთიანებული შტაბის ჟ-6 კავშირგაბმულობისა და ინფორმაციული სისტემების დეპარტამენტის სამმართველოს უფროსი დავით წიფურია.

"ინტერპრესნიუსი"

სიახლე!

თუ დაინტერესებული ხართ მხოლოდ პოლიტიკური თემებით და არ გსურთ, მიიღოთ სხვა, თქვენთვის უინტერესო ინფორმაცია, მოიწონეთ გვერდი, რომელზეც მხოლოდ უმნიშვნელოვანესი პოლიტიკური სიახეები თავსდება.