გიორგი მარგველაშვილი - საშინაო დავალება ძალიან აქტიურად და ეფექტურად შევასრულეთ

საშინაო დავალება ძალიან აქტიურად და ეფექტურად შევასრულეთ, ამიტომ ველით, რომ რიგაში საქართველოს ევროპული არჩევანის ნათელი დაფიქსირება მოხდება, - ამის შესახებ საქართველოს პრეზიდენტმა გიორგი მარგველაშვილმა ტელეკომპანია "მაესტროს" მთავარ საინფორმაციო გამოშვებაში სტურობისას განაცხადა, სადაც რიგის სამიტთან დაკავშირებულ მოლოდინებზე დასმულ შეკითხვას უპასუხა.

პრეზიდენტის თქმით, რიგის სამიტთან მიმართებაში, ყველამ ძალიან აქტიურად იმუშავა, აქტიური იყო პარლამენტი და აღმასრულებელი ხელისუფლება. მისივე განცხადებით, ამ მიმართულებით მნიშვნელოვანი წინ გადადგმული ნაბიჯებია.

"რა თქმა უნდა, ჩვენ აქ არ ვსაუბრობთ, რომ ვიზის ლიბერალიზაცია იქნება მეორე დღიდან, მაგრამ საქართველოს ნათელ ხედვას ევროპასთან მიმართებაში, ევროპამ ასევე ნათელი ხედვით უნდა უპასუხოს საქართველოსთან მიმართებაში. ევროპაში სულ უფრო მეტი სახელმწიფო და მათი ლიდერები იაზრებენ იმას, რომ სტაბილური ევროპა, როგორც უსაფრთხოების, ასევე ეკონომიკური, სოციალური თვალსაზრისით, ვერ შედგება, თუ აღმოსავლეთ პარტნიორობის ქვეყნებთან დაკავშირებით საკითხები არ გადაწყდება", - განაცხადა პრეზიდენტმა.

მისივე თქმით, თუ შუა ევროპაში ომი იქნება, ისე, როგორც ახლა უკრაინაში ხდება, ევროპა სტაბილური ვერ იქნება. "თუ საქართველოს, როგორც უმნიშვნელოვანეს ქვეყანას, რომელიც აღმოსავლეთს და დასავლეთს აკავშირებს ერთმანეთთან და ევროპისთვისვე ქმნის ალტერნატიული ენერგიის მომარაგების შესაძლებლობებს, სატრანსპორტო, სავაჭრო შესაძლებლობებს, თუ ამას ვერ გავიაზრებთ, თუ საქართველოს ვერ შევუქმნით შესაბამის გარემოს, ამ ვითარებაში, ევროპული სტაბილურობა ბოლომდე შემდგარი ვერ იქნება. ჩვენ რიგაში ვიყავით, ამას ხედავენ ჩვენი ლატვიელი პარტნიორები. გვყავს ქვეყნები, რომლებიც ამას ნათლად ხედავენ. თუმცა, ჩვენ გვინდა ბევრად მეტი ქვეყანა იყოს ამაში ჩართული. საშინაო დავალება ძალიან აქტიურად და ეფექტურად შევასრულეთ, ამიტომ ჩვენ ველით, რომ რიგაში საქართველოს ევროპული არჩევანის ნათელი დაფიქსირება მოხდება. სამუშაო ჯერ კიდევ განსახორციელებელია. ჯერ კიდევ აქტიურად ვმუშაობთ ჩვენს პარტნიორებთან", - განაცხადა გიორგი მარგველაშვილმა.

"ინტერპრესნიუსი"