ექს-პრეზიდენტმა მიხეილ სააკაშვილმა ოდესაში ფესტივალის "ძალა ერთობაშია" გახსნის სადღესასწაულო ცერემონიალში მიიღო მონაწილეობა.
"Слава Украине! Слава Грузии! Слава Саакашвили! - დიდება უკრაინას! დიდება საქართველოს! დიდება სააკაშვილს!", - ამ შეძახილებით შეხვდა ასობით უკრაინელი ოდესაში ჩასულ საქართველოს ყოფილ პრეზიდენტს. მიხეილ სააკაშვილმა ოდესაში სახალხო მსვლელობაშიც მიიღო მონაწილეობა.
უკრაინის ქალაქში საქართველოს დღეები იმართება და სწორედ მასზე დასასწრებად იმყოფება ქალაქში პრეზიდენტ პოროშენკოს ქართველი მრჩეველი. მოსახლეობასთან სააკაშვილის შეხვედრის ამსახველი კადრები მისი "ფეისბუქის" გვერდზე გავრცელდა შემდეგი მინაწერით: "იმ "ბრძენი კაცის" მთავრობა ყოველდღე ამტკიცებს, რომ უკრაინელებს ქართველი რეფორმატორები სულ უფრო მეტად ეზიზღებათ.
დღევანდელი დღე ოდესაშიც ამის ნათელი მაგალითია, რომ ბიძინა და ბიძინოიდები არასდროს იტყუებიან", - წერს სააკაშვილი "ფეისბუქის" გვერდზე.
რამდენიმე წუთის წინ მან ოდესაში ვიზიტის ამსახველი ფოტოებიც გამოაქვეყნა, ერთ-ერთ ფოტოზე კი ის შველთან ერთად არის გამოსახული.