ვინ წავა შემდეგი - "ნაციონალების" პოლიტიკური კრიზისის ანალიზი და პროგნოზები

ვინ წავა შემდეგი - "ნაციონალების" პოლიტიკური კრიზისის ანალიზი და პროგნოზები

"ენმ"(ერთიანი ნაციონალური მოძრაობა) რამდენიმე დღის წინ, პარტიის ოთხმა ლიდერმა დატოვა. ვრცელდება ინფორმაცია იმის თაობაზე, რომ შესაძლოა, ოპოზიციური ძალა კიდევ ხუთმა დეპუტატმა დატოვოს.

ვინ შეიძლება იყოს შემდეგი  - Ambebi.ge-მ "ენმ"-ს პოლიტიკური კრიზისის შეფასება ექსპერტ სოსო ცისკარიშვილს სთხოვა.

- მუხრან მაჭავარიანს დავესესხები და ვიტყვი: "იარონ, იარონ, იარონ..." ეს არის ჩემი კომენტარი "ენმ"-ში განვითარებულ მოვლენებზე.

- რას უკავშირებთ ე.წ. ოთხეულის გადაწყვეტილებას.  არსებობს მოსაზრება, რომ ისინი ახალი პოლიტიკური პარტიის ჩამოყალიბებას აპირებენ...

- ჩამოყალიბების მაინცდამაინც არ მჯერა. როცა გულწრფელ აღიარებას მივიღებ მათგან, მაშინ შეგვიძლია ვისაუბროთ ანალიტიკურ პერსპექტივებზე. ქვეყანაში 225 პოლიტიკური სუბიექტია დარეგისტრირებული, ახლა თუ ვინმეს ჰგონია, რომ რაღაც არნახულს შექმნის, ცდება. განვითარებული მოვლენები უფრო მეტი საფრთხის შემცველი ამჟამად შეიძლება გახდეს არსებული საპარლამენტო ფრაქციისთვის. ეს პოლიტიკური ხარაკირის ტოლფასი იქნება. ორ-სამ კვირაში მეტი ინფორმაცია გაჟღერდება. იმდენი ჭორ-მართალი ვრცელდება ამ თემაზე, გული მწყდება, არსებული უამრავი გამოწვევის პირობებში, ჩვენი საზოგადოებისთვის ეს თემა რომ აგრერიგად აქტუალურია.

-  დღეს ყოფილმა "ნაციონალებმა" საკუთარი გადაწყვეტილების თაობაზე განცხადება გაავრცელეს, თუ გაეცანით მას?

- ჯაფარიძის განცხადება არ გამიგია, ანეგდოტის არ იყოს, "ია ნი ჩიტატელ, ია პისატელ".

- ვრცელდება ინფორმაცია, რომ "ოთხეულის" მსგავსად შესაძლოა, "ენმ" მარიამ საჯაიამ, ზურაბ ჭიაბერაშვილმა, დავით ბაქრაძემ და კიდევ რამდენიმე წევრმა დატოვოს. თქვენი აზრით, ვინ შეიძლება იყოს შემდეგი?

- მაინცდამაინც მაგ ოთხეულს გაყვებიან თუ არა, არ ვიცი, მაგრამ თავად ეგ "ოთხიანი" უკვე გაყოლილია იმ მაჟორიტარებს, რომლებმაც გასულ შემოდგომაზე ისკუპეს "ქართულ ოცნებაში". მაშინ რაიმე დრამატიზმი არ შეგვიმჩნევია "ნაცმოძაობის" წევრებისთვის.

რედაქციის რჩევით| "ნაციონალურ მოძრაობაში აღმოჩნდნენ ვირთხები" - რას ამბობდნენ ნაციონალებიდან წასულ კოლეგებზე ლიდერები, რომლებმაც პარტია თავადაც დატოვეს

როგორც ჩანს, არცთუ იაფი დაუჯდათ მუდმივ მაჟორიტარებს საკუთარი თავის გამოხსნა "ნაციონალური მოძრაობისგან". ახლა, როგორც ჩანს, რეალიზაციის პროცესი შეიძლება დაიწყოს პირველი გადასულების. მეგულება "ნაციონალებში" გონიერი და ნიჭიერი ადამიანები, მაგრამ თუ მელაძეს და ხაჩიძეს მოინდომებენ ისინი საკუთარ თავკაცებად, გამიკვირდება და შევშფოთდები.

- ვის გულისხმობთ?

- ბაქრაძეს, ჭიაბერაშვილს. გიგა ბოკერიას გონიერებას, ნიჭს და ენერგიას არავინ უწუნებს, მთავარია თავად იპოვოს საკუთარი თავი. გადანაცვლება სხვა ჯგუფში მათთვის პოლიტიკური დივიდენდის მომტანი არ იქნება. ჯერ თვითონ უნდა შეძლონ საზოგადოების თვალში საკუთარი ხედვის დამკვიდრება, რომელიც განსხვავებული იქნება იმ მიდგომებისგან, რასაც ახორციელებდა "ენმ"-ს ელიტა. ფაქტია, რომ ბაქრაძეს და გილაურს ეკავათ უმაღლესი თანამდებობები, მაგრამ არ შედიოდნენ ქვეყანაში გადაწყვეტილებების მიმღებთა ათეულში. პრაქტიკულად, არალეგალური სადავეები იყო ქვეყნის მართვის ინსტრუმენტი. მათი ნაწილი პატიმარია, ნაწილი ძებნილი, მაგრამ საკუთარი თავის გადაყოლება სიჯიუტის მიმანიშნებელია მხოლოდ იმ ადამიანების მიმართ, ვის მიმართაც სერიოზული აგრესია საზოგადოებას არ აქვს.

- მოულოდნელი იყო თქვენთვის "ოთხეულის" ეს გადაწყვეტილება?

- უსასრულობა არის ვირტუალური ცნება, ყველაფერს დასასრული და დასაწყისი აქვს. მმართველობთი ბერკეტები ამ გუნდმა 2012 წელს დაკარგა, ზნეობრივი სტანდარტები მათ არასოდეს აწუხებდათ, მაგრამ მავნებლური აღმოჩნდა ის სტრატეგია, რომლის განხორციელებაც ნაცმოძრაობამ 2012 წლის 2 ოქტომბრიდან დაიწყო, რაც იყო ლანძღვა-გინება, განქიქება, ცილისწამება, მუდმივი ზეწოლა ახალ ხელისუფლებაზე. ლექსიკაც დაუმძიმდათ, ზრდილობის მარაგი, რომელიც შემოინახეს, საერთოდ განულდა. იმდენი იძახეს, მთავრობა უნიათოაო, ბოლოს თავად ჩამოყალიბდნენ უნიათო "ნაციონალურ უძრაობად".

ნახეთ უფრო მეტი თეგზე #კრიზისი ნაციონალებში

თამარ ბოჭორიშვილი

AMBEBI.GE

"ანტიგმირი უნდა დამალო" -  გია ხუხაშვილი  პარლამენტიდან ვანო ზარდიაშვილის წასვლაზე

უკრაინის პროკურატურამ მიხეილ სააკაშვილის მიმართვაზე საქმე აღძრა

ვანო ზარდიაშვილი პარლამენტს ტოვებს - "ჩემ უკან დგას ჩემი ოჯახი და მცირეწლოვანი შვილები..."