"ე.წ. საზღვრის 200-300 მეტრით გადმოწევით ვერავინ გამდიდრდება" - ბიძინა ივანიშვილი მცოცავ ანექსიაზე

საქართველოს ყოფილი პრემიერ-მინისტრი ბიძინა ივანიშვილი საქართველოს მცოცავ ანექსიაზე "გურია ნიუსთან" საუბრისას აცხადებს, რომ 200-300 მეტრის გადმოწევით ვერავინ გამდიდრდება, საქართველოს ხელისუფლება კი აკეთებს იმას, რისი შესაძლებლობაც რეალობიდან გამომდინარე აქვს.

"რა თქმა უნდა, თვალყურს ვადევნებ და ვიცი ყველაფერი. აღმაშფოთებელია ის, რასაც მეზობელი სახელმწიფო აკეთებს და ისეთი ტიპის პროვოკაციები, რაც ბოლომდე ვერ ამიხსნია, რა არის ეს - დაშინების პოლიტიკაა, თუ რა?!. 200-300 მეტრით ე.წ. საზღვრის გადმოწევით კოლოსალურად ვერავინ გამდიდრდება, მაგრამ ეს არის მძიმე და დანაშაულებრივი პროვოკაცია. მთავრობა აკეთებს ადეკვატურ რეაგირებას - იმას, რაც შეგვიძლია, რეალობიდან. ჩვენ უნდა მოვთხოვოთ ხელისუფლებას, აკეთებენ თუ არა იმ მაქსიმუმს, რისი გაკეთებაც შეუძლიათ. ვთქვათ, განცხადებები ყველა დონეზე, ტუსკის ჩამოსვლა. მართალია, ის ამისთვის არ ჩამოსულა, მაგრამ დაემთხვა ამ ყველაფერს. პატარა ქვეყნის შვილები ვართ, ყველა ერთმანეთს ვხვდებით და ვუყურებთ. მთავრობა აკეთებს ძალიან მიახლოებულს იმასთან, რაც შეუძლია", - აცხადებს ივანიშვილი.

მისივე თქმით, მიმდინარე პროცესები "ნაციონალური მოძრაობის" დაუდევარი ქმედებების შედეგია.

"ახლა ყველაზე მეტი კრიტიკოსები, ვინც ყველაზე მეტად აკრიტიკებს დღევანდელ ხელისუფლებას, არიან "ნაციონალური მოძრაობის" წევრები. მათ გააკეთეს სწორედ ეს უბედურება, მათ დაგვიტოვეს. თუ არა მათი გაუგებარი, უაზრო ქმედებები, როგორც საბავშვო ბაღის ბავშვების, ასე არ იქნებოდა. დღეს მათ გაუბედურებულ და გაპარტახებულ, დატოვებულ შედეგებს ვიმკით. მათ მოახერხეს და მიიყვანეს აქამდე ეს საქმე. მათი უტვინობის და გამოუცდელობის, მათი დაუდევარი ქმედებების შედეგია და დღეს გამოდიან და კიდევ ეს ხალხი ხმაურობს" - განაცხადა "გურია ნიუსთან" ივანიშვილმა.

იხილეთ ვრცლად

”გურია ნიუსი”