ვინ და რა თანხით აფინანსებს ქართულ პოლიტიკას: პარტიების შემოწირულობების მონაცემების მოულოდნელი შედეგი

ვინ და რა თანხით აფინანსებს ქართულ პოლიტიკას: პარტიების შემოწირულობების მონაცემების მოულოდნელი შედეგი

2015 წლის დასაწყისიდან ივლისის ბოლომდე პოლიტიკურ პარტიებს შორის ყველაზე დიდი ოდენობის შემოწირულობა ირაკლი ალასანიას პარტია "ჩვენი საქართველო - თავისუფალმა დემოკრატებმა" მიიღო.

როგორც AMBEBI.GE-სთან საუბარში პოლიტიკური პარტიების ფინანსური საქმიანობის მონიტორინგის სამსახურის უფროსი, ზურაბ აზნაურაშვილის ამბობს, აღნიშნული პარტიისთვის რამდენიმე ფიზიკურმა პირმა საკმაოდ დიდი ოდენობის თანხა გაიღო: "პირველ ადგილზე წელს არის "თავისუფალი დემოკრატები". მათ ჰქონდათ რამდენიმე მსხვილი შემოწირულობა. მსგავსი ტიპის შემოწირულობა არცერთ სხვა პარტიას არ მიუღია. "ნაციონალურ მოძრაობას" ძირითადად საწევრო შენატანები აქვს. მსგავსი მონაცემები აქვთ "რესპუბლიკურ პარტიასაც". საარჩევნო პერიოდიც რომ არ არის, შესაბამისად, არ არის დიდი შემოწირულობები".

პოლიტიკური პარტიების ფინანსური საქმიანობის მონიტორინგის სამსახურის მონაცემებით, 2015 წლის პირველი იანვრიდან 31 ივლისამდე ალასანიას პარტიამ 145 500 ლარი მიიღო. მათგან ყველაზე მსხვილ შემომწირველებს დავით ანდღულაძე, გია ხომასურიძე და ვახტანგ კურტანიძე წარმოადგენენ. მათ 30 000-30 000 ლარი შესწირეს პარტია "თავისუფალ დემოკრატებს". ისინი სხვადასხვა სახის შპს-ებს ფლობენ. ალასანიას პარტიას ასევე 10000-10000 ლარი შესწირეს ალექსანდრე ბურჭულაძემ, ალექსანდრე ჯოხაძემ და გოჩა მინაშვილმა.

რაც შეეხება "ერთიან ნაციონალურ მოძრაობას", იგი შემოწირულობებით მეორე ადგილას გავიდა. ბოლო მონაცემებით, აღნიშნულმა პარტიამ 136 400 ლარი მიიღო. ყოფილ მმართველ გუნდს საკმაოდ ბევრი მსხვილი შემომწირველი ჰყავს. მათ შორისაა საკალათბურთო კლუბ "თბილისის" დამფუძნებელი ლევან ბეჟაშვილი, რომელმაც პარტიას 5000 ლარი გადაურიცხა. ასევე სხვადასხვა შპს-ების მფლობელები - მირიან სარიშვილი, ირმა სტეფნაძე-იაშვილი, გიორგი სულხანიშვილი და სხვა.

შემოწირულობების რაოდენობის მიხედვით ბოლო 7 თვის განმავლობაში მესამე ადგილას ირმა ინაშვილის პარტია "პატრიოტთა ალიანსია", რომელმაც უკვე 54 980 ლარი მიიღო. აღნიშნულ პარტიას 46 040 ლარი გადაურიცხა გოჩა თევდორაძემ, რომელიც "საქართველოს მომხმარებელთა ფედერაცია გეოკონსუმერ"-ის დირექტორია. რაც შეეხება მეორე შემომწირველს, იგი საჯარო რეესტრის მონაცემებით, შპს შუამავალი L.T.D MIDDLEMAN-ის დირექტორი და მფლობელი, ლევან ტაკაშვილია. მან 8884 ლარი გადარიცხა "პატრიოტთა ალიანსისთვის".

რაც შეეხება კახა კუკავას პარტია "თავისუფალ საქართველოს", მან ბოლო შვიდი თვის განმავლობაში შემოწირულობების სახით 29 178 ლარი მიიღო. მეხუთე ადგილას ახალშექმნილი "დევნილთა პარტია" გავიდა 21 400 ლარით.

"რესპუბლიკური პარტიის" შემოწირულობებმა კი მხოლოდ 18 055 შეადგინა. ერთ-ერთი ყველაზე დაბალი მონაცემი აქვს ამ კუთხით პარტია "ქართულ ოცნება - დემოკრატიულ საქართველოს", რომელმაც მხოლოდ 5 065 ლარი მიიღო, მათი უმრალესობა კი საწევროს სახით. ერთადერთი მსხვილი შემოწირულობა მან თამაზ თამაზაშვილისგან მიიღო, რაც 4 600 ლარის ოდენობის არაფულად შემოწირულობაში გამოიხატა.

აღსანიშნავია, რომ 2014 წელს, მთელი წლის განმავლობაში "ქართული ოცნებისთვის" შემოწირულობების სახით მიღებული თანხა გაცილებით მაღალი,  6 157 751,03 ლარი იყო. თუმცა, მაშინ მმართველ გუნდში უფრო მეტი პარტია ერთიანდებოდა. რაც შეეხება "ნაციონალური მოძრაობისთვის" გასული წლის განმავლობაში გადარიცხულ შემოწირულობებს, აღნიშნულმა თანხამ 299,819 ლარი შეადგინა.

"გასული წელი იყო საარჩევნო პერიოდი. საარჩევნო წლის განმავლობაში ჯამდება კოალიციის წევრი პარტიების საერთო შემოწირულობები, მაშინ ექვსი პარტიის გაერთიანებული ჯამი იყო. წელს კი ყველა პარტია ცალ-ცალკე დაჯამდა. მაგალითად, ალასანიას პარტია ხომ წელს ცალკეა. ასევე რესპუბლიკელების მონაცემებიც ცალკე დაჯამდა", - აღნიშნა ზურაბ აზნაურაშვილმა.

რაც შეეხება იურიდიულ პირებს, პოლიტიკური პარტიების ფინანსური საქმიანობის მონიტორინგის სამსახურის უფროსის ინფორმაციით, წლის დასაწყისიდან ივლისის ბოლომდე ერთი შემოწირულობაც არ ყოფილა იურიდიული პირებისგან.

თამთა ჯიჯავაძე

AMBEBI.GE

"ანტიგმირი უნდა დამალო" -  გია ხუხაშვილი  პარლამენტიდან ვანო ზარდიაშვილის წასვლაზე

უკრაინის პროკურატურამ მიხეილ სააკაშვილის მიმართვაზე საქმე აღძრა

ვანო ზარდიაშვილი პარლამენტს ტოვებს - "ჩემ უკან დგას ჩემი ოჯახი და მცირეწლოვანი შვილები..."