საქართველო ნატო-ს მოუწოდებს, გაწევრიანების შესახებ არსებითი გადაწყვეტილება მიიღოს

საქართველო ნატო-ს მოუწოდებს, გაწევრიანების შესახებ არსებითი გადაწყვეტილება მიიღოს

საქართველო მოუწოდებს ნატო-ს, გაწევრიანების შესახებ არსებითი გადაწყვეტილება მიიღოს, - ამ სახელწოდებით სტატიას "რადიო თავისუფლება" აქვეყნებს, რომელსაც ვაშინგტონში მყოფი საქართველოს თავდაცვის მინისტრი თინა ხიდაშელი ესაუბრა.

სტატიის ქართული თარგმანი "ინტერპრესნიუსს" თავდაცვის სამინისტრომ მიაწოდა.

როგორც სტატიაშია ნათქვამია, საქართველოს თავდაცვის მინისტრმა თინათინ ხიდაშელმა ნატო-ს მოუწოდა, ვარშავის სამიტზე საქართველოს ალიანსში საბოლოო გაწევრიანების მიმართულებით არსებითი გადაწყვეტილება მიიღოს.

"რადიო თავისუფლებასთან" (RFE/RL) საუბარში ხიდაშელმა აღნიშნა, რომ გაწევრიანების შესახებ დაპირების შესრულების საკითხში ნატო-ს მხრიდან გამოჩენილი ნებისმიერი ყოყმანი რუსეთს შემდგომი აგრესიული ქმედებებისაკენ უბიძგებს.

"მე-5 მუხლის ქვეყნების გარშემო რკინის ფარდის ჩამოშვებით და ჩაკეტვით ისინი ფართოდ უღებენ კარს ყველა სხვას... აქ გადის ნატო-ს ლიმიტი და სადამდე შეგვიძლია მივიდეთ ჩვენ", - განაცხადა ხიდაშელმა.

როგორც სტატიაშია ნათქვამი, ჩრდილოატლანტიკური ხელშეკრულების მე-5 მუხლის თანახმად, ნატო-ს 28 წევრი ქვეყანა კოლექტიური თავდაცვის პასუხისმგებლობას იზიარებს. ეს ნიშნავს, რომ თავდასხმა ნატო-ს ერთ რომელიმე წევრ სახელმწიფოზე ნიშნავს თავდასხმას ყველა მოკავშირეზე. ნატო-ში საბოლოო გაწევრიანებამდე, საქართველო და ალიანსში შესვლის მსურველი სხვა ქვეყნები ამ უსაფრთხოების ქოლგის ქვეშ ვერ ხვდებიან. საქართველომ პირობა, რომ ნატო-ს წევრი გახდებოდა, 2008 წლის ბუქარესტის სამიტზე მიიღო, თუმცა, მაშინ ქვეყანას უარი უთხრეს MAP-ზე, რაც ალიანსში გაწევრიანების გზაზე პირველი ნაბიჯია. საქართველოსთვის MAP-ის მინიჭების საკითხი არც მომდევნო სამიტებზე - 2012 წელს ჩიკაგოსა და 2014 წელს უელსში დამდგარა დღის წესრიგში.

საქართველოს თავდაცვის მინისტრი აცხადებს, რომ ეს მოსკოვის მიმართ ძალიან არასწორი გზავნილია.

"ნატო-ს გაფართოების შესახებ მტკიცე გადაწყვეტილება ერთადერთი შემაკავებელი ნაბიჯი იქნება არა მხოლოდ რუსეთისთვის, არამედ ყველასთვის, ვინც რუსეთის ქცევას, პროგრესს და უკრაინაში ქმედებებს უყურებს და ჰგონია, რომ ეს პრობლემა სხვა გზით შეიძლება მოგვარდეს", - განაცხადა ხიდაშელმა.

როგორც სტატიაშია ნათქვამია, თინათინ ხიდაშელმა ვაშინგტონში ვიზიტის შესახებაც ისაუბრა, რომლის ფარგლებში აშშ-ის თავდაცვის მდივანს, ეშტონ კარტერს შეხვდა. როგორც ოფიციალური თბილისი აცხადებს, ვიზიტის მიზანი აშშ-თან პარტნიორობის გაძლიერება და საქართველოს ნატო-ში გაწევრიანების გზაზე ვაშინგტონის მხარდაჭერის მოპოვება და რჩევების მიღებაა.

თავდაცვის მინისტრმა ადრეც განაცხადა, რომ სურს ნატო-ს ვარშავის სამიტზე აღიარონ, რომ საქართველომ თანამშრომლობის ყველა მექანიზმი გამოიყენა, რომელსაც MAP ითვალისწინებს, რომელიც დახმარებასა და მხარდაჭერას სთავაზობს ალიანსში შესვლის სურვილის მქონე ქვეყნებს. მან მოუწოდა ვარშავის სამიტის მონაწილეებს პოლიტიკური განცხადება გააკეთონ, რადგან საქართველომ ერთი ნაბიჯი წინ უკვე გადადგა და გაწევრიანების გზაზეა.

როგორც ხიდაშელმა "რადიო თავისუფლებას" განუცხადა, რუსეთის მიერ საქართველოს ორი რეგიონის - სამხრეთ ოსეთისა და აფხაზეთის ოკუპაცია, რომელიც საქართველოს ტერიტორიის 20%-ს წარმოადგენს, ქვეყნის უსაფრთხოებასა და სტაბილურობას საფრთხეს უქმნის.

"საქართველოს დედაქალაქიდან, თბილისიდან 20 წუთის სავალ გზაზე, რუსები დგანან. საქართველოს ტერიტორიაზე 6 000 რუსი სამხედროა განლაგებული, რომლებმაც საქართველო ვარდების რევოლუციის (2003 წლის ნოემბერში) შემდეგ რუსეთის სამხედრო ბაზების გასვლის შემდეგ დატოვეს", - განაცხადა ხიდაშელმა.

როგორც სტატიაშია ნათქვამია, დაძაბულობა მას შემდეგ გაიზარდა, რაც უსაფრთხოების ძალებმა, რომელსაც მოსკოვი უჭერს მხარს, საქართველოს ოკუპირებულ ტერიტორიაზე კიდევ გადმოწიეს ე.წ. სამხრეთ ოსეთის ადმინისტრაციული საზღვარი.

საქართველოს თავდაცვის მინისტრი, რომელიც წამყვანი ფიგურაა აშშ-სა და ნატო-სთან დაახლოების მიმართულებით, არ ეთანხმება მოსაზრებას, რომ ნატო-ს გაფართოება მოსკოვმა შესაძლოა, პროვოკაციად აღიქვას.

"როდესაც ფიქრობენ, რომ ვიღაც შეიძლება გაბრაზდეს, როდესაც ნატო-ს ან ევროკავშირის ქმედებები არ ქმნიან ლეგიტიმურ სივრცეს უმოქმედობისთვის, ეს ვიღაც ყოველდღიურად იპყრობს ტერიტორიებს, დამოუკიდებელ სახელმწიფოებს და ცვლის საერთაშორისო წესრიგს", - განაცხადა ხიდაშელმა.

ვარშავაში ნატო-ს სამიტი 2016 წლის 8-9 ივლისს გაიმართება.

"ანტიგმირი უნდა დამალო" -  გია ხუხაშვილი  პარლამენტიდან ვანო ზარდიაშვილის წასვლაზე

უკრაინის პროკურატურამ მიხეილ სააკაშვილის მიმართვაზე საქმე აღძრა

ვანო ზარდიაშვილი პარლამენტს ტოვებს - "ჩემ უკან დგას ჩემი ოჯახი და მცირეწლოვანი შვილები..."