საგარეო საქმეთა მინისტრის მილიონერი მოადგილის ქონება და შემოსავლები
საგარეო საქმეთა მინისტრის მოადგილე ხათუნა თოთლაძემ ქონებრივი დელარაცია 24 ნოემბერს შეავსო. დოკუმენტის მიხედვით, ოჯახის საკუთრებაშია 3 ბინა თბილისის ცენტრალურ უბანში, 5 მიწის ნაკვეთი, ორი არასაცხოვრებელი ფართი და ავტოფარეხი.
ხათუნა თოთლაძე თბილისში ი. ჭავჭავაძის გამზირზე, 120.00 კვ.მ ფართობისა და ნაფარეულის ქუჩაზე მდებარე 110.00 კვ.მ-ის ფართობის ბინებს ფლობს. მისი მეუღლე დიზაინერი, ავთანდილ ცქვიტინიძე კი, ყიფშიძის ქუჩაზე მდებარე 151.00 კვ.მ-ის ფართობის ბინის მფლობელია.
გარდა ამისა, ხათუნა თოთლაძე ასევე ფლობს, თბილისში ი.ჭავჭავაძის გამზირზე მდებარე 120.00 კვ.მ-ის ფართობის არასაცხოვრებელ ფართს. ავთანდილ ცქვიტინიძის საკუთრებაში კი, თბილისში, კოტე აფხაზის ქუჩაზე მდებარე 640.00 კვ.მ-ის ფართობის არასაცხოვრებელი ფართია.
დეკლარაციის მიხედვით, ხათუნა თოთლაძე ფლობს 2013 წელს გამოშვებულ მსუბუქ ავტომანქანა Mersedes-ს.
ფინანსები
ხათუნა თოთლაძეს საბანკო ანგარიშებზე 52682 ლარი, 873 843.47 დოლარი და 401.54 ევრო ჰქონდა. მისი მეუღლის ავთანდილ ცქვიტინიძის საბანკო ანგარიშებზე კი - 23 ლარი და 5000 ევრო იყო. გარდა ამისა, ცქვიტინიძის ანაბარზე დეკლარაციის შევსებისას, 31200.81 ლარი ირიცხებოდა, ხოლო ნაღდი ფულის სახით - 8500.00 ლარი ჰქონდა.
რაც შეეხება ხათუნა თოთლაძის ანაბრებს, საერთო ჯამში ორ ანაბარზე "თი ბი სი" ბანკში მას 2 მილიონი დოლარი აქვს. შვილს, ანასტასია ცქვიტინიძეს კი, ამავე ბანკის ანაბარზე 1 მილიონი დოლარი ერიცხება.
დეკლარაციის შევსებისას, ხათუნა თოთლაძეს ნაღდი ფულის სახით 10000.00 ევრო, გარდა ამისა, "თი-ბი-სი" ბანკის 100 ცალი ობლიგაცია აქვს, რომელთა ღირებულებაც 10000.00 დოლარია.
საჩუქრები
დეკლარაციაში ასევე აღნიშნულია, რომ გასულ წელს ხათუნა თოთლაძემ ბებიისგან საჩუქრად 1000000.00 დოლარი მიიღო; მშობლებმა კი, 3 500000.00 დოლარი აჩუქეს.
დეკლარაციის გასავლის გრაფაში ასევე აღნიშნულია, რომ გასულ წელს ხათუნა თოთლაძეს მოგზაურობა 10000.00 ევრო დაუჯდა.