"უბრალოდ სირცხვილია... საჯაროდ მივმართავ ყოფილ მინისტრს" - თინა ხედაშელი ირაკლი ალასანიას განცხადებას პასუხობს
თავდაცვის მინისტრი თინა ხიდაშელი მისი წინამორბედის, ირაკლი ალასანიას მიერ PALITRANEWS-ის ეთერში გაკეთებულ განცხადებას ფეისბუქის პირად გვერდზე ვრცელი პოსტით ეხმაურება.
"ეხლა დავბრუნდი ქვეყანაში და ეს ამბავი დამხვდა: "ხიდაშელის უწყებას ის პოლიტიკური ჩარჩოები დაუწესეს, რასაც მე ვერ მიწესებდნენ" საჰაერო თავდაცვასთან დაკავშირებით", - აღნიშნა ალასანიამ PALITRANEWS-ის გადაცემაში "360 გრადუსში" სტუმრობისას.
რატომღაც მეგონა საჰაერო თავდაცვის თემა დასრულებული იყო - შევცდი.
- ეს არის ქვეყნის უსაფრთხოების ერთ ერთი უმნიშვნელოვანისი საკითხი და სწორედ ამიტომ მაქსიმალურად ვცდილობ არავის ავყვე სპეკულაციებსა და ტყუილის ტირაჟირებაში.
- ეს არის თემა სადაც სამწუხაროდ არ მაქვს უფლება და შესაძლებლობა, ხელშეკრულება რომელსაც მე მოვაწერე ხელი და რომელიც მის დროს მომზადდა საჯარო გავხადო, ან მათი შედარებითი ანალიზი გავაცნო საზოგდოებას. ამას დიდი სიამოვნებით გავაკეთებდი, იმის სადემონსტრაციოდ, თუ სინამდვილეში რამდენად აბსურდულია სპეკულაცია, და რას მივაღწიეთ 2 თვეში 24-საათიანი მუშაობით სწორედ ჩემი მინისტრობის შემდეგ.
- უბრალოდ სირცხვილია. განსაკუთრებით სირცხვილია, იმიტომ რომ ერთი წელი გავიდა, ყველაფერი გავაკეთე რომ უპასუხოდ დამეტოვებინა ბრალდებები, მაგრამ როდესაც პრორუსული შეტევების ნარატივში ეწერება ვინმე, როდესაც სრულიად ღია, თავაშვებული, მართული, კონცენტრირებული შეტევა მიმდინარეობს და ვინმე ხელის მოსაკიდი ადგილის ძებნას იწყებს, შეუძლებელია ეს უპასუხოდ დავტოვო.
- ყოფილი თავდაცვის მინისტრი ხელშეკრულების ხელმოწერამდეც და მისი შემდეგაც მუდამ გამოხატავდა უკმაყოფილებას და ეს, ქვეყნის უსაფრთხოებისა და თავდაცვისუნარიანობისათვის უმნიშვნელოვანესი თემა უდიდესი პოლიტიკური სპეკულაციის საგნად აქცია. კიდევ უფრო მეტად იმის შემდეგ, რაც რეალურად აღმოჩნდა, რომ მხოლოდ მონდომება და საკმარისი პოლიტიკური ნება იყო საჭირო ამ საქმის უკეთ გასაკეთებლად და ბოლომდე მისაყვანად. მე მინისტრობის პირველივე დღეს ვთქვი მაქსიმალურად შემჭიდროვებულ ვადებში მოვაწერ ხელშეკრულებას ხელს-თქო, და ზუსტად ისე, როგორც ყველა სხვა პირობის შემთხვევაში რომელიც მინისტრად დანიშვნის დროს დავდე აქაც მყისიერად ვაჩვენეთ შედეგი.
- სპეკულაციების დასრულების მიზნით, შარშან ივლისში, პარიზიდან ჩამოსვლისთანავე ჩემი ინიციატივით საპარლამენტო ნდობის ჯგუფის შეხვედრა ჩატარდა, სადაც სრულიად ნათლად და ცალსახად წარვადგინეთ პირობები, სხვაობა მანამდე არსებულ ვერსიასა და ხელმოწერილ დოკუმენტს შორის. გაუმჯობესებული პირობები, გაუმჯებესებული თავდაცვა, უკეთესი ცა. მე პირადად, სამჯერ მივმართე თდ-ების წარმომადგენელს ნდობის ჯგუფში კითხვები დაესვა, ასეთის არსებობის პირობებში რათა არაფერი დარჩენილიყო პასუხგაუცემელი. ზურა აბაშიძეს არც ერთი კითხვა არ ქონდა, არც ერთ პრეტენზია არ წამოუყენებია და არც ერთი შენიშვნა არ ქონია.
- არ ვიცი რა უნდა მოხდეს რომ ამ თემას წერტილი დაესვას. უბრალოდ სირცხვილია, როცა ზუსტად იცი, რომ საჯაროდ შინაარსს ვერ მოყვებიან და პირობებს ვერ გააცნობენ საზოგადოებას. აქ მხოლოდ ჩემს რეპუტაციაზე არ ვსაუბრობ, ეს ქვეყნის უსაფრთხოების უმნიშვნელოვანესი თემაა, და როდემდე შეიძლება ეს ყალბი გოდება და უსაფუძვლო საუბრები ვისმინოთ, რომ შეიძლებოდა ქვეყნის უკეთ დაცვა და ვინმემ ეს არ გააკეთა, დაწესებული პოლიტიკური შეზღუდვების გამო.
- საჯაროდ მივმართავ ყოფილ მინისტრს, ზუსტად, დეტალურად წარმოადგინოს პრეტენზიების სია, პოლიტიკური შეუძლებლობების სია, დეტალურად განმარტოს პოლიტიკური ჩარჩოების არსი, კომპონენტები, კონკრეტული გამოხატულება.
- როგორც ჩანს ბატონმა ირაკლიმ, ხიდაშელისთვის დაწესებული პოლიტიკური ჩარჩოები ყველაზე ნათლად კაბელების საქმეზე ბრალდებული პირების სამსახურში დაბრუნების დროს დაინახა და იმის შემდეგ არ ტოვებს განცდა, დამეხმაროს ამ შეზღუდვების მოხსნაში", - წერს ხიდაშელი პოსტში.
"ანტიგმირი უნდა დამალო" - გია ხუხაშვილი პარლამენტიდან ვანო ზარდიაშვილის წასვლაზე
უკრაინის პროკურატურამ მიხეილ სააკაშვილის მიმართვაზე საქმე აღძრა
