"ჩვენ გავაქრობთ მურუსიძის სინდრომს" - პაატა ბურჭულაძის მთავარი პოლიტიკური გზავნილები პარტიის ყრილობიდან

მოძრაობა "სახელმწიფო ხალხისთვის" ლიდერი პაატა ბურჭულაძე მოსახლეობას არჩევნებში მონაწილეობისკენ მოუწოდებს. როგორც ბურჭულაძემ მოძრაობის დამფუძნებელ ყრილობაზე სიტყვით გამოსვლისას განაცხადა, უმრავლესობა, იმედგაცრუების გამო, მომავალ არჩევნებზე "გამსვლელი არაა".

მოძრაობის ლიდერმა ქუთაისში ერთ-ერთ ხანდაზმულ ქალბატონთან შეხვედრა გაიხსენა და მას კიდევ ერთხელ სთხოვა, 2012 წლის მსგავსად, არჩევნებზე მისვლა.

"ქუთაისში მითხრეს, ერთ ხანდაზმულ ქალბატონს შენი ნახვა უნდა, მაგრამ ლოგინადაა ჩავარდნილი. მივედით დეიდა მარიამთან. წლებია ეს ქალი თურმე სახლიდან ვერ გამოდის. მომიყვა, რომ მხოლოდ 2012 წლის 1 ოქტომბერს, ძალიან მოინდომა, ღმერთს სთხოვა, ძალა მომეციო, მეზობლებს სთხოვა, დამეხმარეთ და დიდი გაჭირვებით წავიდა არჩევნებზე, რომ "ქართული ოცნებისთვის" ხმა მიეცა. როგორც არასდროს ცხოვრებაში, ისე ვიყავი დარწმუნებული, რომ ქვეყანა სწორ გზაზე დადგებოდა და ჩემნაირი ხალხისთვის იქნებოდაო. მე, სახლიდან გამსვლელი აღარ ვარ, დედაო მითხრა. გული დამეწვა, ვიცი, რომ უმრავლესობა ამას ფიქრობთ. 2012-ში ყველამ ასე გაიჭირვეთ, ყველამ მოინდომეთ და შეუძლებელი შეძელით. თქვენმა სიმამაცემ შეცვალა უსამართლო ხელისუფლება და დღეს არავის აქვს უფლება რამე დაგამადლოთ და საკუთარ თავზე დაიბრალოს ეს გამარჯვება. თქვენ გაიმარჯვეთ, მაგრამ სახელმწიფო ისევ აღარ არის ხალხისთვის, როგორც არ იყო წინა მთავრობის დროს. ამიტომ გამარჯვებას გაგრძელება სჭირდება! ღმერთმა გვიცოცხლოს დეიდა მარიამი, რომ ნახოს როგორ დადგება ქვეყანა სწორ გზაზე და როგორი იქნება ახალი სახელმწიფო მისნაირი ხალხისთვის. დეიდა მარიამ, გთხოვთ კიდევ ერთხელ გაიჭირვოთ და მოხვიდეთ არჩევნებზე! იმიტომ, რომ მეც ისეთივე მოტყუებული ვარ, როგორც თქვენ! იმიტომ, რომ მეც ისეთივე იმედგაცრუებული დამტოვა, ჯერ "ნაციონალურმა მოძრაობამ" და მერე "ქართულმა ოცნებამ", როგორც თქვენ. ჩვენ აღარ უნდა ვიოცნებოთ! ჩვენ უნდა ვიმოქმედოთ", - განაცხადა პაატა ბურჭულაძემ.

მოძრაობა "სახელმწიფო ხალხისთვის" ლიდერმა დარბაზში მყოფ სანდრო გირგვლიანის მამასაც მიმართა და აღნიშნა, რომ დღევანდელი ხელისუფლება სანდრო გირგვლიანის სახელის გამოყენებით მოვიდა სათავეში.

"ბატონო გურამ მე გაძლევთ პირობას, მურუსიძის სინდრომს ჩვენ გავაქრობთ. გავაქრობთ კანონიერად!!!. მე გაძლევთ პირობას, რომ თქვენ არასოდეს ინანებთ, რომ დღეს აქ ზიხართ და მე ვაძლევ პირობას ყველა იმ ადამიანს, რომელსაც დაპირდნენ, სამართლის აღდგენას, თუმცა მათი სამართალი დღემდე არ აღმდგარა. ჩვენ ვიყავით პირველები, ვინც გავაპროტესტეთ მურუსიძის დანიშვნა. თავიდანვე ავტეხეთ განგაში, რადგან ცხადი იყო, რომ გირგვლიანის საქმის მოსამართლე, მურუსიძით ბრუნდებოდა "ნაციონალური მოძრაობა", "ქართული ოცნების" სახით. და აი შედეგიც, უკვე სახეზეა მურუსიძისეული გადაწყვეტილებები, გნებავთ "რუსთავი-2"-ზე და გნებავთ ე.წ კაბელების საქმეზე. პოლიტიზებული სასამართლო,რომელიც ხელისუფლების დაკვეთას ასრულებს, ზუსტად ისე, როგორც ასრულებდა წინა ხელისუფლების დროს", - განაცხადა პაატა ბურჭულაძემ.

მოძრაობა "სახელმწიფო ხალხისთვის" ლიდერმა პირობა დადო, რომ ხელისუფებაში მოსვლის შემთხვევაში მისი გუნდი სასამართლოს გაათავისუფლებს.

"ჩვენ განვახორციელებთ შინაგან საქმეთა სამინისტროსა და უსაფრთხოების სამსახურების რეალურ რეფორმას, განვახორციელებთ ძალოვანი სტრუქტურების დეპოლიტიზირებას, განვამტკიცებთ ადამიანის უფლებებსა და თავისუფლებებს, ვუზრუნველყოფთ საკონსტიტუციო სასამართლოს გაძლიერებას, სამოქალაქო საზოგადოებას ვაქცევთ ხელისუფლების პარტნიორად. ამის შედეგად მივიღებთ თავისუფალ ადამიანს თავისუფალ ქვეყანაში, ადამიანს, რომელიც სუნთქვას თავისუფლად, ადამიანს, რომელსაც აქვს უფლებები, ადამიანს, რომელიც დაცულია", - აღნიშნა სიტყვით გამოსვლისას ბურჭულაძემ.

ასევე იხილეთ: ვინ არიან პაატა ბურჭულაძის გუნდის ახალი სახეები

იხილეთ ვიდეო: ეფექტური სანახაობა ბურჭულაძის პირველი ყრილობიდან - რა ხდებოდა სპორტის ახალ სასახლეში