"არ ვიცი რას გულისხმობს, როდესაც საუბრობს ჩემი ნიკა გვარამიას ოჯახის წევრობაზე" - მოსამართლე ქეთევან ერემაძე თეა წულუკიანს პასუხობს

 "არ ვიცი რას გულისხმობს, როდესაც საუბრობს ჩემი ნიკა გვარამიას ოჯახის წევრობაზე" - მოსამართლე ქეთევან ერემაძე თეა წულუკიანს პასუხობს

დიახ, მე და ჩემი კოლეგები ნამდვილად ვართ ძალიან მიკერძოებულები, ოღონდაც ჩვენი ქვეყნის კონსტიტუციის მიმართ, უდავოდ და იმის პრეტენზია და ამბიცია ნურავის ნუ ექნება, რომ შეეჯიბროს პირველობაში მაინცდამაინც კონსტიტუციას, - ამის შესახებ საქართველოს საკონსტიტუციო სასამართლოს პირველი კოლეგიის წევრმა მოსამართლემ, ქეთევან ერემაძემ იუსტიციის მინისტრის, თეა წულიკიანის განცხადების საპასუხოდ აღნიშნა.

როგორც ქეთევან ერემაძემ განმარტა, მისთვის უცნობია რას გულისხმობს თეა წულუკიანი, როცა მისი და ნიკა გვარამიას ოჯახის წევრობაზე საუბრობს. მოსამართლის განმარტებით, მისი ოჯახის წევრები არიან მშობლები და და-ძმა და თუ მინისტრი საუბრობს პოლიტიკურ ოჯახზე, ეს მისთვის, როგორც მოსამართლისთვის, უხერხული და კომიკურია.

„არ მაქვს უფლება პოლიტიკურ დებატებში შევიდე, მაგრამ საკითხი შეეხო ჩემი და ჩემი კოლეგების პროფესიული ღირსების საკითხს, მქონდა პატივი ჩემს კოლეგებთან ერთად 10 წლის განმავლობაში მემუშავა საკონსტიტუციო სასამართლოში და ერთად გვეკეთებინა უაღრესად საინტერესო და თავისი ბუნებით კეთილშობილური საქმე. არ ვიცი ქალბატონი თეა წულუკინი რას გულისხმობს როდესაც საუბრობს ჩემი ბატონი ნიკა გვარამიას ოჯახის წევრობაზე. ჩემი ოჯახის წევრები არიან ნამდვილად დედა, მამა, და-ძმა. თუ ის საუბრობს ბატონი ნიკა გვარამიას პოლიტიკურ ოჯახზე პირადად ჩემს პოლიტიკურ სენტიმენტებზე ნებისმიერი პოლიტიკური ჯგუფის მიმართ, მათ შორის, ბატონი ნიკა გვარამიას პოლიტიკური ოჯახის თუ დღევანდელი ხელისუფლების ან ნებისმიერი სხვა პოლიტიკური ჯგუფის მიმართ სულ მცირე, ძალიან უხერხულია, კომიკურია და ეს არაჩვეულებრივად იცის ქალბატონმა მინისტრმა, ძალიან კარგად იცის ხელისუფლებამ, ძალიან კარგად იცის ოპოზიციამ და ყველამ, ვისაც ჯანსაღი ან ხშირად არაჯანსაღი ინტერესი აქვს სასამართლოს მიმართ“, - აღნიშნა ქეთევან ერემაძემ.

ამასთან, მოსამართლემ ისაუბრა წინა ხელისუფლების დროს მისი მუშაობის პერიოდზე და აღნიშნა, რომ „ნიკა გრავამიას პოლიტიკული ოჯახი“ არც თუ ისე იშვიათად აბრალებდა პოლიტიკურ მიკერძოებულობას მაშინდელი ოპოზიციის მიმართ, რომელიც ახლა ხელისუფლებაშია.

ქეთევან ერემაძემ კონკრეტული საქმეც გაიხსენა, როცა ნიკა გვარამია იყო დეპუტატი და იღებდა კანონებს, ხოლო მანანა კობახიძე წარმოადგენდა მოსარჩელე მხარეს და ის კონკრეტული სარჩელი პირველმა კოლეგიამ დააკმაყოფილა.

„ბატონი ნიკას პოლიტიკური ოჯახი ასევე, ქალბატონი წულუკიანის მსგავსად, არც თუ ისე იშვიათად მაბრალებდა პოლიტიკურ მიკერძოებულობას მაშინდელი ოპოზიციის და მაშასადამე დღევანდელი ხელისუფლების მიმართ. მიზეზი იყო იგივე, ძალიან პრინციპული გადაწყვეტილებები. ბატონი ნიკა გვარამია იყო პოლიტიკაში, ის იყო დეპუტატი, იღებდა კანონებს და მე და ჩემმა კოლეგებმა არაერთი კანონი ვცანით არაკონსტიტუციურად. თუ მაინცდამაინც სტატისტიკით არიან დაინტერესებული, წინა ხელისუფლების მიერ მიღებული კანონები გაცილებით უფრო მეტჯერ იქნა არაკონსტიტუციურად ცნობილი, ვიდრე დღევანდელი ხელისუფლების პირობებში. ჩემი კოლეგიის პირველივე საქმე, რომელიც ბატონი ნიკა გვარამიას ინიცირებით შევიდა პარლამენტში როდესაც ის იყო, არ მახსოვს ის იყო იურიდიული კომიტეტის თავმჯდომარის მოადგილე, და ქალბატონი მანანა კობახიძე იყო მოსარჩელე დიახ, ჩვენ დავაკმაყოფილეთ ის კონსტიტუციური სარჩელი და არა მგონია მაინცდამაინც ბატონი ნიკა გვარამია მაშინ ამით ძალიან ბედნიერი ყოფილიყო“, - აღნიშნა ქეთევან ერემაშვილმა. მისივე თქმით, ის ამაყობს პირველი კოლეგიის გადაწყვეტილებებით და მისი მოსამართლეობის ვადის ამოწურვამდე იმდენჯერ იქნება კანონი არაკონსტიტუციურად ცნობილი, რამდენჯერაც კონსტიტუციასთან კონფლიქტში მოვა.

„ძალიან ვამაყობ ყველა გადაწყვეტილებით, რაც მე და ჩემი კოლეგიის წევრებმა მივიღეთ 10 წლის განმავლობაში. ჩვენი უფლებამოსილების ვადის ამოწურვამდე, რა თქმა უნდა, ისევ არაკონსტიტუციურად იქნება ცნობილი იმდენჯერ კანონი, რამდენჯერაც ის კონსტიტუციასთან კონფლიქტში იქნება და არამც და არამც სხვა მოტივაციით, რასთან დაკავშირებითაც აქვთ ეჭვები“, - აღნიშნა ქეთევან ერემაძემ.

თეა წულუკიანის საპასუხოდ განცხადება გუშინ საკონსტიტუციო სასამართლომაც გაავრცელა. თეა წულუკიანი საკონსტიტუციო სასამართლოს პირველი კოლეგიის მოსამართლეებს მიკერძოებულობაში ადანაშაულებს.

იუსტიციის მინისტრ თეა წულუკიანის განცხადებით, ის სვამს კითხვებს და აინტერესებს ამ კითხვებზე პასუხი. ”ამ პასუხებმა უნდა აჩვენოს, არის თუ არა საკონსტიტუციო სასამართლო, მისი თავმჯდომარე და პირველი კოლეგია პოლიტიკური თამაშის ინსტრუმენტი, არის თუ არა ეს ინსტიტუტი ამის გამო „ნაციონალური მოძრაობის“ სამსახურში. ჩემი გადასახედიდან ირღვევა რიგითობის პრინციპი. რატომ ირღვევა? ჩვენ თუ ავიღებთ მაგალითად „რუსთავი 2”-ის შვიდ საკონსტიტუციო სარჩელს, შვიდივე განიხილა პირველმა კოლეგიამ. რიგითობა ირღვევა. ეს ნიშნავს იმას, რომ პრობლემა შეიძლება ჰქონდეს ასეთი მიკუთვნების დროს საქმის ობიექტურად გადაწყვეტას და პრობლემა შეიძლება ჰქონდეს მთლიანად საკონსტიტუციო სასამართლოს მიკერძოებულობის მხრივ”, - აღნიშნა წულუკიანმა.

"ანტიგმირი უნდა დამალო" -  გია ხუხაშვილი  პარლამენტიდან ვანო ზარდიაშვილის წასვლაზე

უკრაინის პროკურატურამ მიხეილ სააკაშვილის მიმართვაზე საქმე აღძრა

ვანო ზარდიაშვილი პარლამენტს ტოვებს - "ჩემ უკან დგას ჩემი ოჯახი და მცირეწლოვანი შვილები..."