საფრანგეთში მყოფ საქართველოს მოქალაქეებს შეუძლიათ დარეკონ ნომერზე +33783318689

ნიცაში მომხდარი ტერორისტული აქტის გამო საფრანგეთში საქართველოს საელჩო საქართველოს მოქალაქეებისთვის ცხელი ხაზის ნომერს აქვეყნებს . საფრანგეთში მყოფ საქართველოს მოქალაქეებს შეუძლიათ დარეკონ ნომერზე +337833186 89. "საქართველოს მოქალაქეების საყურადღებოდ! დღეს, 14 ივლისს, ქალაქ ნიცაში მომხდარ ტერორისტულ აქტთან დაკავშირებით, შეგახსენებთ საელჩოში მოქმედი ცხელი ხაზის ნომერს +33783318689. ასევე გთხოვთ, გვაცნობოთ თუ ფლობთ ინფორმაციას დაზარალებული საქართველოს მოქალაქეების შესახებ", - ნათქვამია საელჩოს მიერ გავრცელებულ ინფორმაციაში.

საფრანგეთში საქართველოს ელჩმა ეკა სირაძე-დელონემ "ინტერპრესნიუსს" განუცხადა, რომ საფრანგეთში საქართველოს საელჩოში ნიცაში მომხდარი ტერორისტული აქტის შედეგად საქართველოს მოქალაქეების დაშავების ან დაღუპვის შესახებ ამ ეტაპზე არანაირი ინფორმაცია არ შესულა.

მისივე განმარტებით, ჯერჯერობით მთავარი აქცენტი მოქალაქეებისთვის პირველადი დახმარების აღმოჩენაზეა გადატანილი და არა იმის აღრიცხვაზე, დაშავებულები ან გარდაცვლილები რომელი ქვეყნის მოქალაქეები არიან.

"ჩვენ ვცდილობთ გადავამოწმოთ ინფორმაცია და ყველა შესაბამის უწყებას ვუკავშირდებით, თუმცა ამ ეტაპზე არ ვფლობთ არანაირ ინფორმაციას, არიან თუ არა ქართველები გარდაცვლილთა ან დაშავებულთა შორის. ეს ჯერ არავინ იცის, ვინაიდან ამ ეტაპზე მიმდინარეობს მოქალაქეებისთვის პირველადი დახმარების გაწევა და არაა საუბარი იმაზე, ვინ რომელი ქვეყნის მოქალაქეა", - განაცხადა ეკა სირაძე-დელონემ. რაც შეეხება უშუალოდ მომხდარს, ელჩის ინფორმაციით, საფრანგეთში ამ ეტაპზე ღიად ტერორისტულ აქტზე არ საუბრობენ და მომხდარს "კრიმინალურ აქტად" აფასებენ. "სამწუხაროდ, ხალხი სხვა მიმართულებით იყურებოდა და ბევრს არ დაუნახავს სატვირთო ავტომობილი, რომელიც მოქალაქეებში შევარდა და სრული ამ სიტყვის მნიშვნელობით, გადასრისა ქალები, ბავშვები.... საუბარია 2-3 ტონიან მანქანაზე. ხალხი არც კი გაწეულა, არ ელოდა ასეთ ფაქტს. რაც შეეხება მომხდარის შეფასებას, ფრანგები ძალიან ფრთხილობენ და ამ ეტაპზე ღიად და დადასტურებულად არ საუბრობენ, რომ ეს იყო ტერაქტი. ამბობენ, რომ მომხდარი არის კრიმინალური აქტი. სატვირთოს მძღოლი პოლიციის მიერ მოკლულია. ამ ეტაპზე საუბარია იმაზე, რომ ის მარტო იყო და სხვა მოკავშირეები არ ჰყოლია", - აღნიშნა საქართველოს ელჩმა.

ნიცაში მომხდარ შემთხვევას, ამ დროის მონაცემებით, 77-ზე მეტი ადამიანი ემსხვერპლა. დაშავებულია 100-ზე მეტი.