საგარეო უწყება - ბათუმში თურქეთის გენერალური კონსულის ინტერვიუ მედიაში არასწორად იქნა ინტერპრეტირებული

საქართველოში თურქეთის ელჩის, ლევენთ გუმრუქჩუს განცხადებით, ბათუმში თურქეთის გენერალური კონსულის ინტერვიუ არასწორად იქნა წარმოდგენილი და განცხადებები არასწორად იქნა ინტერპრეტირებული მედიაში, - საქართველოს საგარეო საქმეთა სამინისტროს ინფორმაციით, ამის შესახებ ელჩმა საგარეო საქმეთა მინისტრის მოადგილე გიგი გიგიაძესთან შეხვედრაზე განაცხადა.

მათივე ცნობით, შეხვედრაზე ქართულმა მხარემ ყველა დასმულ კითხვაზე ამომწურავი ინფორმაცია მიიღო.

"მხარეებმა ხაზი გაუსვეს, რომ ორ სტრატეგიულ პარტნიორ ქვეყანას შორის საუკეთესო თანამშრომლობა არის ყველა მიმართულებით, მათ შორის უსაფრთხოების საკითხებზე და მომავალშიც გაგრძელდება თანამშრომლობა ყველა მნიშვნელოვან საკითხზე შესაბამის ფორმატებში", - ნათქვამია სამინისტროს განცხადებაში.

არსებული ინფორმაციით, თურქეთის გენერალური კონსულის, იასინ თემისქანის განცხადებით, ბათუმში შაჰინის სახელობის მეგობრობის ლიცეუმში ტერორისტებს ზრდიან. ტვ 25-ის ცნობით, კონსულმა მათთან ინტერვიუში აღნიშნა, რომ სასწავლო დაწესებულებას ტერორისტული დაჯგუფებები მართავენ, რის შესაბამისადაც, იქ ბავშვები მათივე იდეოლოგიის ქვეშ იზრდებიან.

მისივე თქმით, ფეთჰულა გიულენის ორგანიზაციას საგანმანათლებლო დაწესებულებების ქსელი აქვს. ის აჭარის მოსახლეობას მოუწოდებს, ბავშვები სკოლიდან გამოიყვანონ, წინააღმდეგ შემთხვევაში კი ისინი სავალალო შედეგის წინაშე აღმოჩნდებიან.