თამაზ მეჭიაური - "ოცნების" მაჟორიტარობის ბევრ კანდიდატს რუსეთში აქვს ბიზნესი "გახურებული" და ნატო-ს წევრ ქვეყნებში ნამყოფიც არ არის
"ქართული ოცნების" მაჟორიტარობის ბევრ კანდიდატს გაუჭირდება ამომრჩეველს ნატო-სადმი თავისი ერთგულება დაუმტკიცოს - ბევრ მათგანს რუსეთში ბიზნესი აქვს "გახურებული", - ამის შესახებ ჟურნალისტებს დეპუტატმა თამაზ მეჭიაურმა "ქართული ოცნების" მიერ დასახელებულ მაჟორიტარობის კანდიდატებზე საუბრისას განუცხადა.
მეჭიაურის თქმით, მაჟორიტარობის ზოგიერთი კანდიდატი "მისნაირი ტიპაჟია".
"ბევრ მათგანს რუსეთში აქვს გახურებული ბიზნესი და მგონი დასავლეთში, ნატო-ს წევრ ქვეყნებში ნამყოფიც არ არის. როცა ვკითხავ, რა აქვთ საერთო რებრენდინგირებულ "ქართულ ოცნებასთან", ასევე" ნაციონალურ-რესპუბლიკურ პარტიასთან", საინტერესოა რას მიპასუხებენ? ახალი სინდიოზი შეიქმნა ახალი სახეებით, რომლებსაც დაემატათ პოსტსაბჭოთა სახეები ანუ ჩემნაირი ტიპაჟები. როგორ უნდა შეაჯვარონ ეს ყველაფერი, მათი პრობლემაა", - განაცხადა თამაზ მეჭიაურმა.
დეპუტატი ეჭვობს, რომ ყოფილი პრემიერი ბიძინა ივანიშვილი "ქართულ ოცნებას" კარგად აღარ აფინანსებს და პარტია "ფულიან მაჟორიტარებს" ეძებს.
რაც შეეხება იმას, თუ რატომ ვერ მოხვდა "ოცნების" მაჟორიტარების სიაში ომარ ნიშნიანიძე, მეჭიაურმა აღნიშნა: "როგორც ჩანს, ნიშნიანიძეს ფული არ აქვს და თავის საარჩევნო კამპანიას ვერ იფინანსებს".
არ მეგონა, თუ თამაზ მეჭიაურსაც ახასიათებდა ისეთი ტიპის განცხადებების გაკეთება, რომელთაც საფუძველი არ გააჩნია, - ამის შესახებ უმრავლესობის ერთ-ერთმა ლიდერმა გია ვოლსკიმ თამაზ მეჭიაურის განცხადების საპასუხოდ განაცხადა.
გია ვოლსკის აზრით, თამაზ მეჭიაურმა უკეთესია დააკონკრეტოს, თუ ვის გულისხმობს განცხადებაში, რომ "ქართული ოცნების" წევრებს მოსკოვში "გახურებული ბიზნესი" აქვთ.
"თამაზ მეჭიაურმა უკეთესია დაასახელოს, თუ ვის გულისხმობს, როცა ამბობს, რომ გახურებული ბიზნესი აქვს მოსკოვში. ამის მერე უფრო საინტერესო გახდება მისი განცხადება. ასეთი როყიო, ჰაერზე გაკეთებული განცხადებები, როგორც ჩანს, არ მოხსნილა ჩვენი პოლიტიკური დღის წესრიგიდან და, სამწუხაროა. წინასაარჩევნო ინსინუაციებია და არ მეგონა თუ თამაზსაც ახასიათებდა ასეთი განცხადებები, რომელთაც საფუძველი არ გააჩნია", - განაცხადა გია ვოლსკიმ.
"ანტიგმირი უნდა დამალო" - გია ხუხაშვილი პარლამენტიდან ვანო ზარდიაშვილის წასვლაზე
უკრაინის პროკურატურამ მიხეილ სააკაშვილის მიმართვაზე საქმე აღძრა
