პარტია "ერთიანი საქართველოსთვის" თავმჯდომარემ, ირაკლი ოქრუაშვილმა ორგანიზაციის კომიტეტის სამი წევრი და ახალგაზრდული ორგანიზაციისთავმჯდომარე ლერი ლაფაჩი პარიზში სტუმრად მიიწვია. გვესაუბრება ლერი ლაფაჩი:
- ბატონმა ირაკლიმ პარიზში თავისი ინიციატივით ჩაგვიყვანა, მგზავრობის ხარჯი პარტიამ გაიღო, იქ ჩასულებს კი სასტუმრო უკვე დაჯავშნილი დაგვხვდა.
ბატონმა ირაკლიმ ძალიან თბილად მიგვიღო, მეგობრულად შეგვხვდა. აეროპორტში მიხეილ ქარელი დაგვხვდა და სასტუმროში მან წაგვიყვანა, სადაც მოგვიანებით ირაკლი ოქრუაშვილიც მოვიდა, ვისაუბრეთ საქართველოში არსებულ ვითარებაზე და შიდაპარტიულ საქმეებზე.
პარიზში 4 დღე დავყავით და ამ ხნის განმავლობაში პარტიის თავმჯდომარეც ჩვენთან იყო, დაგვათვალიერებინა ღირსშესანიშნავი ადგილები - ნოტრდამი, მონმარტრი, ამის შემდეგ ოჯახშიც მიგვიპატიჟა.
- როგორ ცხოვრობს ირაკლი ოქრუაშვილი პარიზში?
- როგორც რიგითი პარიზელი. თბილისში ამბობენ, ძვირად ღირებული ავტომობილები ჰყავსო, ამიტომ ძალიან გამიკვირდა, როცა მისი მანქანა, წითელი "როვერ მინი" ვნახე.
- ბატონი ირაკლი ფრანგული ცხოვრების ყაიდაზე ხომ არ გადასულა?
- (იცინის) არა, ისეთივეა, როგორიც გახსოვთ, უშუალო და სტუმართმოყვარე. სულ საქართველოზე გველაპარაკებოდა. მე მასში პატრიოტი დავინახე, შევატყვე, რომ ძალიან ენატრება თბილისი.
- სამშობლოში ჩამოსვლას არ აპირებს?
- ალბათ, მალე ჩამოვა და ქართველი ხალხის გვერდით დადგება.
სოფო ყარალაშვილი
ყოველკვირეული გაზეთი ”ყველა სიახლე”
(გამოდის ხუთშაბათობით)
