თინა ხიდაშელი - ბიძინა ივანიშვილის მხრიდან სამი კვირის განმავლობაში მოვისმინეთ უწყვეტი შეურაცხყოფებისა და უზრდელობების კასკადი

ბიძინა ივანიშვილის მხრიდან სამი კვირის განმავლობაში მოვისმინეთ უწყვეტი შეურაცხყოფებისა და უზრდელობების კასკადი, - ამის შესახებ რადიო "პალიტრის" გადაცემაში "საღამოს თოქ-შოუ" "რესპუბლიკური პარტიის" ერთ-ერთმა ლიდერმა თინა ხიდაშელმა განაცხადა. ხიდაშელი იმედოვნებს, რომ ივანიშვილი თავადვე მიხვდა, რომ გადააჭარბა.

"ძალიან დიდი იმედი მაქვს, თავად მიხვდა, რომ გადააჭარბა შეურაცხყოფებში. იმედია, ეს არის მიზეზი, რომ აღარ ვუხსენებივართ. განვითარება, რატომ გამწვავდა, მე არ ვიცი. ეს ბიძინა ივანიშვილს უნდა ვკითხოთ, რადგან ჩვენ ერთი სიტყვა არ გვითქვამს. ჩვენ ვატარებთ საარჩევნო კამპანიას ჩვენი ხედვებით, ჩვენი პროგრამით, პოლიტიკური არჩევანის გაცნობით ვართ დაკავებული მოსახლეობისთვის. თუმცა, ამასობაში, სამი კვირის განმავლობაში მოვისმინეთ უწყვეტი შეურაცხყოფებისა და უზრდელობების კასკადი, რომელიც ჩვენს მიმართ წამოვიდა. არის მომენტი, როდესაც თვლი, რომ პასუხი უნდა გასცე", - განაცხადა ხიდაშელმა.

მისივე თქმით, ბიძინა ივანიშვილი მიხვდება, რომ შეურაცხყოფების კასკადი, რომელიც "რესპუბლიკელების" წინააღმდეგ წამოვიდა, იყო ყოველგვარი დასაშვებობის ფარგლებს გარეთ.

"მე არავის ბოდიშის მოხდას არ ვთხოვ, ჩემი შვილებისთვის არ მომითხოვია ბოდიშის მოხდა, თუ ისინი ვერ აცნობიერებენ ამას. მე გამოვთქვი ვარაუდი, რომ როდესაც ვნებები ჩაცხრება, ის მიხვდება, რომ შეურაცხყოფების კასკადი, რომელიც ჩვენს წინააღმდეგ წამოვიდა, იყო ყოველგვარი დასაშვებობის ფარგლებს გარეთ. ეს არაერთხელ მომხდარა მანამდე. ადამიანს მხოლოდ ღირსებას ჰმატებს, როდესაც ის ბოდიშს მოიხდის", - განაცხადა ხიდაშელმა.