გიგა ბოკერია - ეჭვმიტანილი კი არა, ბრალდებული და განაჩენგამოტანილია ამ ვითარების შექმნაში ივანიშვილი და მისი გუნდი

ამ ვითარების შექმნაში ბრალდებული და განაჩენგამოტანილია ივანიშვილი და მისი გუნდი, რომელმაც მთელი ეს 4 წელიწადი ანგრია ინსტიტუციები, - ამის შესახებ ჟურნალისტებს "ნაციონალური მოძრაობის" ერთ-ერთმა ლიდერმა გიგა ბოკერიამ განუცხადა, რითაც მათი პარტიის წევრის, გივი თარგამაძის ავტომანქანის აფეთქებას გამოეხმაურა.

ბოკერიას თქმით, აქვთ საფუძველი, მომხდარში ეჭვმიტანილად ჩათვალონ სუს-ი, ვინაიდან გივი თარგამაძე ცნობილია მასთან დაპირისპირებით.

"ეს არის კიდევ ერთი დასტური იმის, თუ საით მიჰყავს ივანიშვილს და მის გუნდს ქვეყანა. იმ დროში გვაბრუნებს, სადაც არ გვიკვირდა ხოლმე ასეთი უბედურებები, რომლებიც ეხებოდა არა მარტო პოლიტიკოსებს, არამედ ჩვეულებრივ ადამიანებს. ყველას უნდა ესმოდეს, რომ ეს არ არის იმათი პრობლემა, ვის წინააღმდეგაც იყო ახლა ეს თავდასხმა მიმართული. ყველამ იცის, გივი თარგამაძეს ვისთან ჰქონდა პოლიტიკურად მთავარი დაპირისპირება - ეს არის სუს-ი და მისი უფროსი გოგაშვილი. ეს საჯაროდ ცნობილი ამბავია. ყველას გვაქვს საფუძველი, რომ ეჭვმიტანილებად ჩავთვალოთ ისინი, მაგრამ ყველა შემთხვევაში, სანამ რაღაცას ვიტყვით და მოგვეცემა უფრო მეტ დეტალზე რამის თქმის საშუალება, ეჭვმიტანილი კი არა, ბრალდებული და განაჩენგამოტანილია ამ ვითარების შექმნაში ივანიშვილი და მისი გუნდი, რომელმაც მთელი ეს 4 წელიწადი ანგრია ინსტიტუციები, სიძულვილის ქადაგებასა და ძალადობის ჩადენაში გაატარეს და ეს ინსტიტუციები, სუს-ით დაწყებული, აქციეს საკუთარ მარიონეტებად პოლიტიკური ამოცანებისთვის", - განაცხადა ბოკერიამ.

მისივე თქმით, ეროვნული ამოცანაა, რომ 8 ოქტომბერს უფსკრულისკენ მიმავალი გზიდან ქვეყანა გადმოვიყვანოთ ნორმალური განვითარების გზაზე, წინააღმდეგ შემთხვევაში კი, შედეგი იქნება გაცილებით მძიმე. "აგონიაზე მეტია ეს, რასაც ვხედავთ ივანიშვილის რეჟიმის მხრიდან. ასეთი ფაქტები უკვალოდ ქვეყნის ცხოვრებიდან არ მიდის", - აღნიშნა ბოკერიამ.

რამდენიმე საათის წინ, "პირიმზესთან" "ერთიანი ნაციონალური მოძრაობის" ერთ-ერთი ლიდერის, გივი თარგამაძის ავტომანქანა ააფეთქეს. დაშავებულია 4 პირი, მათ შორის თარგამაძის მძღოლი.