რუსეთის საგარეო უწყება - რუსეთსა და საქართველოში ჩატარებული საპარლამენტო არჩევნების შემდეგ, ორივე მხარე დაინტერესებულია დიალოგის გაგრძელებით

რუსეთის საგარეო უწყება - რუსეთსა და საქართველოში ჩატარებული საპარლამენტო არჩევნების შემდეგ, ორივე მხარე დაინტერესებულია დიალოგის გაგრძელებით

რუსეთსა და საქართველოში ჩატარებული საპარლამენტო არჩევნების შემდეგ, ორივე მხარე დაინტერესებულია დიალოგის გაგრძელებით. შესაბამის განცხადებას რუსეთის საგარეო საქმეთა სამინისტრო ავრცელებს.

განცხადებაში, რომელშიც რუსეთის საგარეო საქმეთა მინისტრის მოადგილეს, გრიგორი კარასინსა და საქართველოს პრემიერ-მინისტრის სპეციალურ წარმომადგენელ, ზურაბ აბაშიძეს შორის 19 ოქტომბერს, პრაღაში გამართული შეხვედრის შედეგებია შეჯამებული, აღნიშნულია, რომ შეხვედრას რუსეთისა და საქართველოს სატრანსპორტო უწყებების წარმომადგენლებიც ესწრებოდნენ.

„ხაზი გაესვა იმას, რომ რუსეთისა და საქართველოში გამართული საპარლამენტო არჩევნების შემდეგ, ორივე მხარე დაინტერესებულია დიალოგის გაგრძელებით იმ სფეროებში, სადაც, დიპლომატიური ურთიერთობის არარსებობის ფონზე შესაძლებელია პროგრესის მიღწევა - ესენია ვაჭრობა, ტრანსპორტი, კულტურულ-ჰუმანიტარული სფერო“, - ნათქვამია განცხადებაში.

რუსეთის საგარეო საქმეთა სამინისტრო იმასაც აღნიშნავს, რომ რუსულმა მხარემ საქართველოსთვის ქართული ფილმების არქივის გადაცემა დაიწყო.

„მხარეებმა გამოთქვეს მზადყოფნა, გააგრძელონ პრაგმატული კურსი, რომელიც მიმართულია ორმხრივი ურთიერთობების შემდგომი ეტაპობრივი ნორმალიზებისკენ“, - ნათქვამია განცხადებაში.

რუსეთის საგარეო უწყების ცნობით, გრიგორი კარასინისა და ზურაბ აბაშიძის შემდეგი შეხვედრა 2017 წლის დასაწყისში გაიმართება.

"ინტერპრესნიუსი"

"ანტიგმირი უნდა დამალო" -  გია ხუხაშვილი  პარლამენტიდან ვანო ზარდიაშვილის წასვლაზე

უკრაინის პროკურატურამ მიხეილ სააკაშვილის მიმართვაზე საქმე აღძრა

ვანო ზარდიაშვილი პარლამენტს ტოვებს - "ჩემ უკან დგას ჩემი ოჯახი და მცირეწლოვანი შვილები..."