დავით თარხან-მოურავი - ჩემი მიზანი იყო, აჭარის მთავრობას სათავეში ჩავდგომოდი

ჩემი მიზანი იყო, აჭარის მთავრობას სათავეში ჩავდგომოდი, - ამის შესახებ „პატრიოტთა ალიანსის“ ლიდერმა დავით თარხან მოურავმა განაცხადა და ის მიზეზი განმარტა, რის გამოც აჭარის უმაღლეს საბჭოში შესვლაზე უარი განაცხადა და პარტიის მიერ მოპოვებული ერთადერთი მანდატი სიის მეორე ნომერ ზაზა ოქუაშვილს დაუთმო.

როგორც თარხან-მოურავმა GDS-ის ეთერში აღნიშნა, 1 მანდატით „პატრიოტთა ალიანსი“ აჭარლებისთვის მიცემულ დაპირებას ვერ შეასრულებს და შესაბამისად, უმაღლეს საბჭოში პირადად მის ყოფნას აზრი არ აქვს.

„ჩვენ გავაკეთეთ განცხადება, რომ საქართველოს საპარლამენტო არჩევნების სიის პირველი ნომერი იქნებოდა გენერალური მდივანი ირმა ინაშვილი, მე კი ვიქნებოდი პირველი ნომერი აჭარიის სიის იმ მიზნით და იმედით, რომ აჭარაში 8 კაცს მაინც გავიყვანდით, 11-კაციან კოალიციას შევქმნიდით და გვექნებოდა ძალა, რომ დაგვემტკიცებინა აჭარის მთავრობის ხელმძღვანელი და მე თვითონ ჩავუდგებოდი აჭარის მთავრობას სათავეში. მიზანი იყო, რომ ჩავდგომოდი აჭარის მთავრობას სათავეში. ახლა იქ ჩვენ დაგვიწერეს 1 ხმა, რაც უდავოდ სიყალბეა. მე როგორც პარტიის თავმჯდომარემ, ერთმა კაცმა რა შემიძლია გავაკეთო აჭარის უმაღლეს საბჭოში? იმისთვის, რომ პარტიის პოზიცია დავაფიქსიროთ სხვადასხვა საკითხზე, ამას გააკეთებს მეორე ნომერიც, მესამეც და მეოთხეც და პარტიას ხომ უნდა ვუხელმძღვანელო მე? ამიტომ აზრი დაკარგა. მე იმ დაპირებების შესრულებას ვერ შევძლებ“, - განაცხადა დავით თარხან-მოურავმა და დასძინა, რომ ის „პატრიოტთა ალიანსის“ ხელმძღვანელობას გააგრძელებს.

"ინტერპრესნიუსი"