უმაღლესი საბჭოს არჩევნებში აჭარის ექვსივე მაჟორიტარულ ოლქში "ქართული ოცნების" კანდიდატები ლიდერობენ

უმაღლესი საბჭოს არჩევნებში აჭარის ექვსივე მაჟორიტარულ ოლქში "ქართული ოცნების" კანდიდატები ლიდერობენ. უმაღლესმა საარჩევნო კომისიამ უკვე დაიწყო ვებ-გვერდზე შედეგების განთავსება. უსკო-ს მონაცემებით, ხულოს N73-ე ოლქში დათვლილია 52 უბნის მონაცემები, რომლის მიხედვითაც "ქართული ოცნების" კანდიდატს ხვიჩა შარაშიძეს ხმათა 71.63% აქვს, ხოლო "ნაციონალური მოძრაობის" კანდიდატს ნუგზარ ამაღლობელს 28.37%.

ქობულეთის N71-ე მაჟორიტარულ ოლქში 8 უბნის მონაცემებია დათვლილი, რომლის მიხედვითაც, "ქართული ოცნების" კანდიდატს გიორგი რომანაძეს ხმათა 77.07% აქვს, ხოლო "ნაციონალური მოძრაობის" კანდიდატს მამული სურმანიძეს - 22.93%. ხელვაჩაურის N72-ე მაჟორიტარულ ოლქში 3 უბნის მონაცემებია ცნობილი, სადაც "ქართული ოცნების" კანდიდატმა მერაბ კარანაძემ ხმების 71.31% მიიღო, "ნაციონალური მოძრაობის" კანდიდატმა ქენან კახიძემ კი - 28.69%. ბათუმის N69 მაჟორიტარულ ოლქში 2 უბნის მონაცემებია დათვლილი, რომლის მიხედვითაც "ქართული ოცნების" კანდიდატმა ილია ვერძაძემ ხმათა 70.22% მიიღო, ხოლო "ნაციონალური მოძრაობის" კანდიდატმა ნინო ჯინჭარაძემ - 29.78%. ბათუმის N68 მაჟორიტარულ ოლქში სულ 1 უბნის მონაცემებია ცნობილი, სადაც "ქართული ოცნების" კანდიდატი ვახტანგ წულაძე ხმების 72.26%-ით ლიდერობს, ხოლო "ნაციონალური მოძრაობის" კანდიდატს ელგუჯა ბაგრატიონს 27.74% ერგო. ბათუმის N70 მაჟორიტარულ ოლქშიც 1 უბნის მონაცემებია ცნობილი, რომლის მიხედვითაც, "ქართული ოცნების" კანდიდატმა და სიის პირველმა ნომერმა ნუგზარ სურმანიძემ ხმათა 82.87 % მიიღო, ხოლო "ნაციონალური მოძრაობის" კანდიდატმა გია აბულაძემ 17.13%.

აჭარის უმაღლესი საბჭოს არჩევნები საქართველოს პარლამენტის არჩევნების პარალელურად მიმდინარეობდა. აჭარის საკანონმდებლო ორგანოში სულ 21 მანდატია. აქედან 15 დეპუტატს პროპორციული სიით ირჩევენ, ხოლო 6 მაჟორიტარული სისტემით აირჩევა. პროპორციული არჩევნების შედეგების მიხედვით, "ქართულ ოცნებას" 8 მანდატი ერგო, "ნაციონალურ მოძრაობას" 5 მანდატი, ხოლო "ნინო ბურჯანაძე - დემოკრატიული მოძრაობა" და "პატრიოტთა ალიანსი" თითი-თითო მანდატით იქნებიან წარმოდგენილი უმაღლეს საბჭოში. ექვსივე მაჟორიტარულ ოლქში გამარჯვების შემთხვევაში "ქართული ოცნება" უმრავლესობას მოიპოვებს. აჭარის უმაღლესი საბჭო მრავალპარტიული იქნება.