ვლადიმერ პაპავა - ენერგეტიკის მინისტრმა პასუხისმგებლობა უნდა აიღოს და წარუმატებელი მოლაპარაკებების გამო თანამდებობა დატოვოს

ენერგეტიკის მინისტრმა პასუხისმგებლობა უნდა აიღოს და წარუმატებელი მოლაპარაკებების გამო, რომელმაც ქვეყანას ზიანი მიაყენა, თანამდებობა უნდა დატოვოს, - ამის შესახებ პროფესორმა, თბილისის სახელმწიფო უნივერსიტეტის ყოფილმა რექტორმა, ვლადიმერ პაპავამ "პალიტრანიუსის" გადაცემაში "360 გრადუსი" განაცხადა.

მისი თქმით, "გაზპრომთან" მოლაპარაკებების და ახალი რეჟიმის ამოქმედების შესახებ ინფორმაცია ჯერ კიდევ ნოემბერში, სომხურ მედიაში ვრცელდებოდა.

"გაზპრომთან" მიმართებით ქართულ მხარეს, მგონი არაფერი დაუთმია. შარშან, როდესაც ბატონი კალაძე იძახდა, რომ ვალდებული ვართ გადავიდეთ ნატურიდან ფინანსურ ანაზღაურებაზე, ამას მოჰყვა საზოგადოების ჯანსაღი აურზაური. როგორც ჩანს, კალაძემ და მისმა გუნდმა "გაზპრომს" სთხოვეს, რომ საპარლამენტო არჩევნებზე არ გვინდა საქმის გაფუჭება და მოდით ერთი წელი დავტოვოთ ეს რეჟიმი და შემდეგ ამ საკითხს დავთმობთო.

ახლახან გავეცანი ინფორმაციას სომხურ წყაროებზე, რომელიც გამოქვეყნებულია 7 ნოემბერს. იქ წერია, რომ სომხეთი აპირებს თავის მოსახლეობას გაზის ტარიფი შეუმციროს და ამის საფუძველი ის იქნება, რომ "გაზპრომი" საქართველოსთან დაიწყებს მოლაპარაკებას, ნატურის ნაცვლად გადავიდეს ფასით ანაზღაურებაზეო, ამიტომ ჩვენ უკვე შეგვეძლება 1000 კუბური მეტრი მივიღოთ არა 165 დოლარად, არამედ 150 დოლარადო.

როდესაც ამბობდნენ, რომ ჩვენ უკნონოდ ვიღებთ გაზს, აქამდე არ იცოდნენ?! ნოემბერში დაეწყოთ მოლაპარაკება, ხომ ისევ თვითონ დარჩნენ მთავრობაში, ისევ იგივე ენერგეტიკის მინისტრი გვყავს, ისევ იგივე ფუნქციითაა ამ მოლაპარაკებაში ჩართული. ვთვლი, რომ ეს არ არის უბრალოდ შეცდომა, ყველანი ადამიანები ვართ და ჩემი თავი დავაყენე მის ადგილას, დავუშვათ და ვერ მოვახერხე ჩემი ქვეყნის ინტერესების დაცვა, ეს ყველას შეიძლება მოუვიდეს, მაგრამ შენ თუ თავმოყვარე ხარ, ქვეყნის პატრიოტი ხარ და ვერ შეძელი ქვეყნის ინტერესების დაცვა, უნდა აუხსნა საზოგადოებას, ბოდიში მოუხადო და გადადგე, მაგრამ შენ რადგან ხელშეკრულებას აწერ ხელს, ე.ი პასუხისმგებლობას იღებ, რომ ქვეყანას მიაყენე ზიანი", - განაცხადა ვლადიმერ პაპავამ.