„ნაციონალური მოძრაობა“ ახალ ფრაქციას ყრილობის შემდეგ შექმნის

”ნაციონალური მოძრაობის” ერთ-ერთ ლიდერ რომან გოცირიძის ინფორმაციით, პარტიის წევრები საპარლამენტო ფრაქციებს - ”ევროპული საქართველო” და “ევროპული საქართველო უკეთესი მომავლისათვის“ ყრილობის შემდეგ დატოვებენ და ახალ ფრაქციას შექმნიან.

როგორც გოცირიძემ ”ინტერპრესნიუსს” განუცხადა, ”ნაციონალურ მოძრაობას” ფრაქციის შესაქმნელად საჭირო რაოდენობა - 6 დეპუტატი ჰყავს, თუმცა, გოცირიძე ამ დროისთვის არ აკონკრეტებს, ვინ შეუერთდება მას და იქნება თუ არა ეს აზერ სულეიმანოვი. ამ დროისთვის ცნობილია, რომ ახალ ფრაქციაში შევლენ ნიკა მელია, თინა ბოკუჩავა, კობა ნაყოფია და სალომე სამადაშვილი.

ფრაქციის შექმნის თემაზე საუბრისას თინა ბოკუჩავამ განაცხადა, რომ პარტიიდან გასული დეპუტატები მიმართავენ ხრიკებს იმის წარმოსაჩენად, რომ მოქმედ წევრებს მოუწიათ ფრაქციის დატოვება.

”ეს არის მათი პროცედურული ხრიკები, რათა გამოაჩინონ ისე, რომ მათ კი არ დატოვეს ფრაქცია, ჩვენ მოგვიწია ფრაქციის დატოვება. თუმცა საზოგადოებისთვის ნათელია, რომ ე.წ. უგულავა ბოკერიას გუნდმა დატოვა ”ნაციონალური მოძრაობა” და, შესაბამისად, პარლამენტშიც ისინი სხვა პოლიტიკური ჯგუფის სახელით წარდგებიან. ჩვენ ვიყავით, ვართ და ვიქნებით იქ, სადაც მოგვცა ჩვენმა ამომრჩეველმა ხმა. ეს არის ”ერთიანი ნაციონალური მოძრაობა”. ჩვენ არ ვაპირებთ, რომ ერთი პარტიის მიერ მოპოვებული ხმები გამოვიყენოთ სხვა პოლიტიკური გუნდის საქმიანობისთვის, რასაც აწ უკვე ყოფილი თანაგუნდელები აპირებენ”, - განაცხადა ბოკუჩავამ.

მისივე თქმით, ”ნაციონალური მოძრაობა” გააგრძელებს საქმიანობას პარლამენტში. ”ფრაქცია ”ნაციონალური მოძრაობა” პარლამენტში იქნება და, შესაბამისად, საკანონმდებლო ინიციატივებს და ცვლილებებს, რაც მნიშვნელოვანია მოსახლეობისთვის, აუცილებლად გავაჟღერებთ. რაც შეეხება ბიუროკრტიულ და პროცედურულ საკითხებს, ჩვენთვის ახლა მთავარი ამოცანა ამ საკითხებით დაკავება ნამდვილად არ არის. ჩვენ ვემზადებით ყრილობისთვის, რომელიც ჩატარდება დემოკრატიული სტანდარტით. ”ერთიანი ნაციონალური მოძრაობა” დატოვა ე.წ. ბოკერიას გუნდმა და, შესაბამისად, მათ უნდა შექმნან ახალი ფრაქცია, საკუთარი სახელწოდება მოიფიქრონ და გაავრცელეს კიდეც ამაზე ინფორმაცია. ანუ ამ პროცედურული დეტალებით დაკავება ამ ეტაპზე ჩვენთვის არ არის პრიორიტეტი. თუმცა, კიდევ ერთხელ ვადასტურებთ, რომ ჩვენ ვაგრძელებთ საპარლამენტო საქმიანობას, მათ შორის ფრაქციის ფარგლებში. საგაზაფხულო სესიის დაწყებამდე საზოგადოებას ვაცნობებთ, თუ რა კონფიგურაციის იქნება ზუსტად ”ნაციონალური მოძრაობის” ფრაქცია. საზოგადოებისთვის უკვე ცნობილია რამდენიმე ადამიანი, ვინც ამ ფრაქციაში შევა. რაც შეეხება აზერ სულეიმანოვს, მე მის მაგივრად არ ვისაუბრებ”, - განაცხადა ბოკუჩავამ.

საპარლამენტო ფრაქცია ”ნაციონალურ მოძრაობას” სახელწოდება შეეცვალა და მას ”ევროპული საქართველო” ეწოდა. ამასთან, ფრაქციის წევრებმა ახალი თავმჯდომარე აირჩიეს. ნიკა მელიას ნაცვლად ფრაქციას სერგო რატიანი უხელმძღვანელებს. ფრაქციის სხდომაზე მიღებული გადაწყვეტილება ჟურნალისტებს გიგი წერეთელმა გააცნო.

სახელწოდება უმცირესობაში შემავალ კიდევ ერთ ფრაქციას შეეცვალა - ფრაქციას “ნაციონალური მოძრაობა - საქართველოს წინსვლისთვის“, რომელსაც დეპუტატი ელენე ხოშტარია ხელმძღვანელობს, “ევროპული საქართველო უკეთესი მომავლისათვის“ ეწოდა.

გარდა ამისა, როგორც ფრაქციის სხდომის დასრულების შემდეგ ჟურნალისტებს ხოშტარიამ განუცხადა, ფრაქციის შემადგენლობას ირაკლი აბესაძე და თენგიზ გუნავა დაემატნენ. მისი თქმით, “ყველა გადაწყვეტილება მიღებულია მკაცრად პარლამენტის რეგლამენტის დაცვით“.

ელენე ხოშტარიას ინფორმაციით, ამ დროისთვის ფორმალურად ფრაქციის შემადგენლობაში რჩებიან ის დეპუტატები, რომლებიც პარლამენტში “ნაციონალურ მოძრაობას“ წარმოადგენენ.