Українська революція ფარულ ჩანაწერს აქვეყნებს: "ადეიშვილი და გვარამია 3-მილიონიან ქრთამს აძლევენ მოსამართლეებს"

საინფორმაციო-ანალიტიკური გამოცემა Українська революція ვებ-გვერდზე საუბრის ჩანაწერს აქვეყნებს, რომელიც მათი ინფორმაციით საქართველოს იუსტიციის ყოფილ მინისტრ, ზურაბ ადეიშვილსა და ტელეკომპანია "რუსთავი 2"-ის გენერალურ დირექტორ, ნიკა გვარამიას შორის შედგა.

მოისმინეთ აუდიოჩანაწერი

"Скандал. (Аудио) Адеишвили и Гварамия дают взятку в 3 миллиона доллара судьям!" (სკანდალი: ადეიშვილი და გვარამია 3-მილიონიან ქრთამს აძლევენ მოსამართლეებს) - ასეთი სათაურით აქვეყნებს აუდიოჩანაწერს გამოცემა.

საუბარი, სავარაუდოდ, "რუსთავი 2"-ის საქმესთან დაკავშირებულ სასამართლო პროცესს შეეხება. ისმის ორი მოსამართლის გვარი - ალავიძე და ახვლედიანი, საიდანაც, როგორც ცნობილია, უზენაესი სასამართლოს მოსამართლე ბესარიონ ალავიძე "რუსთავი 2"-ის საქმის მოსამართლეა. ჩანაწერის მიხედვით, აღნიშნული პირები 3 მილიონის გაცემაზე საუბრობენ, რასთან დაკავშირებითაც, სავარაუდოდ, ნიკა გვარამია აღნიშნავს, რომ "3 მილიონი სალაპარაკოც არ უნდა იყოს", ამასთან, ამბობს, რომ "ახვლედიანმა ალავიზეძე ბევრად უფრო მეტი ფასის საქმე შეასრულა".

ჩანაწერის მიხედვით, სავარაუდოდ, ადეიშვილი თანამოსაუბრეს ეუბნება, რომ "იქ უნდა ჩავიდეს", რაზეც გვარამია პასუხობს, რომ "ჩაივლის, მაგრამ ყარამანიშვილებთან ლაპარაკის თავი არ მაქვს" და ტელეკომპანიის მფლობელ ძმებს უწმაწური სიტყვებით მოიხსენიებს.

ჩანაწერის ბოლოს, სავარაუდოდ ადეიშვილი თანამოსაუბრეს ეუბნება, რომ "ეს მარტო მისი კი არა, ყველას პრობლემებია".

შეგახსენებთ, რომ ამავე ვებ-გვერდმა რამდენიმე დღის წინ გამოაქვეყნა მიმოწერა, რომელშიც საიტის მტკიცებით, მიხეილ სააკაშვილსა და დავით საყვარელიძეს შორის შედგა. საუბარში ნახსენებია საქართველოს უზენაესი სასამართლოს მოსამართლეების - ბესარიონ ალავიძის და პაატა ქათამაძის გვარები, რომლებიც "რუსთავი 2"-ის საქმეს განიხილავენ.

წყარო: uarevo.in.ua