კვირის ყველაზე კითხვადი სტატიები
თვის ყველაზე კითხვადი სტატიები
11:33 / 05-05-2017
რა ბედი ეწია წყნეთის სამთავრობო აგარაკებს, სადაც სააკაშვილის ხელისუფლების წევრები ცხოვრობდნენ
წყნეთის სამთავრობო აგარაკები, სადაც მიხეილ სააკაშვილის ხელისუფლების წევრები ოჯახებთან ერთად (მათ შორისაა უგულავას, სანდრა რულოვსის, მერაბიშვილისა და ბოკერიას აგარაკები) წლების მანძილზე ცხოვრობდნენ, დღეს ღია აუქციონის წესით ქირავდება.

"ოცნების" ხელისუფლების მოსვლის შემდეგ, უკვე ყოფილმა პრემიერ-მინისტრებმა - ბიძინა ივანიშვილმა, ირაკლი ღარიბაშვილმა და ხელისუფლების სხვა წარმომადგნელებმა, არაერთხელ ისაუბრეს ამ ქონების უფრო გონივრულად და ეფექტურად გამოყენებაზე, თუმცა რეალური ნაბიჯები ამ მიმართულებით არ გადადგმულა. 17 აგარაკი 2013 წლის შემდეგ ხელმისაწვდომია ნებისმიერისთვის, ვისაც მისი ქირაობის სურვილი და ფინანსური რესურსი აქვს. მოგვიანებით, 2014 წელს ქონება საპრივატიზაციო ნუსხაში მოხვდა, მას შემდეგ რაც მთავრობამ სავალუტო კრიზისიდან გამოსასვლელი გეგმა წარმოადგინა. თუმცა, ქონება რეალურად არ გაყიდულა და მათი იჯარით გაცემა გრძელდება. აგარაკებიდან მხოლოდ ერთია გაყიდული.

"ერთიანი ნაციონალური მოძრაობის" მმართველობის პერიოდში წყნეთის სამთავრობო აგარაკები საქართველოს ეკონომიკისა და მდგრადი განვითარების სამინისტროს სსიპ "სახელმწიფო ქონების ეროვნულ სააგენტოს" განკარგულებაში იყო. 2014 წელს აგარაკები, როგორც უძრავი ქონება, საკუთრებაში გადაეცა (კაპიტალში შეტანის გზით) სახელმწიფო 100%-იანი წილით დაფუძნებულ საწარმოს შპს "სახელმწიფო მომსახურების ბიუროს". 2015 წლის მაისში კი "სახელმწიფო ქონების ეროვნული სააგენტოს" ვებ-გვერდზე გამოჩნდა დეტალები სამთავრობო აგარაკების გაყიდვასთან დაკავშირებით. იმ პერიოდში წყნეთის სამთავრობო აგარაკებს სახელმწიფო 21 560 000 დოლარად ყიდდა.


"სახელმწიფო ქონების ეროვნული სააგენტოს" ვებ-გვერდზე განთავსებული ინფორმაციის თანახმად, მიწის ფართობი 100 475 კვ. მეტრს შეადგენს, შენობა-ნაგებობების ფართობი კი - 8041.8 კვ.მ. ქონება სულ 21 შენობა-ნაგებობას მოიცავს.

ამჟამად "შპს "აქტივების მართვისა და განვითარების კომპანიაში" აცხადებენ, რომ საკუთრებად რეგისტრირებული უძრავი ქონების იჯარის წესით გაცემა ხორციელდება ელექტრონული აუქციონის საფუძველზე, ლიცენზირებული აუდიტორის მიერ განსაზღვრული საწყისი საიჯარო ფასით. ელექტრონულ აუქციონში მონაწილეობა (ვებ-გვერდზე www.eauction.ge) ნებისმიერ მსურველის შეუძლია.

"სულ 17 აგარაკია. საწყისი ფასი 3 000 ლარია, ზოგ შემთხვევაში კი თვიური იჯარის ღირებულება 11 000 ლარს აღწევს. სხვადასხვა კოტეჯს განსხვავებული ფასი აქვს. ზაფხულის სეზონი სულ დატვირთულია. სტუმრების ნაწილი ქართველები არიან, ნაწილი - უცხოელები. ხშირად გვყავს ამერიკელი დამსვენებლები," - აღნიშნა AMBEBI.GE-სთან საუბარში წყნეთის სამთავრობო აგარაკების ზედამხედველმა დავით დარახველიძემ.



რაც შეეხება ერთ გაყიდულ აგარაკს - საქართველოს მთავრობის 2016 წლის 27 ოქტომბრის განკარგულებით, დაბა წყნეთში მდებარე 8 226 კვ.მ. არასასოფლო-სამეურნეო დანიშნულების მიწის ნაკვეთი და მასზე განთავსებული რამდენიმე შენობა-ნაგებობა პირდაპირი მიყიდვის ფორმით 4 288 320 ლარად საკუთრებაში გადაეცა ფიზიკურ პირს თამაზ სომხიშვილს. უძრავი ქონების საბაზრო ღირებულება სსიპ "ლევან სამხარაულის სახელობის სასამართლო ექსპერტიზის ეროვნულმა ბიურომ" დაადგინა.

1957 წელს დაბადებული თამაზ სომხიშვილი 50 ყველაზე მდიდარ ქართველს შორის სახელდება. სხვადასხვა წყაროს ცნობით, მისი ქონება ასეულობით მილიონ დოლარს აღწევს. ქართველმა მილიონერმა საქართველო გასული საუკუნის 90-იან წლებში დატოვა და რუსეთში გადავიდა საცხოვრებლად, სადაც სხვადასხვა ბიზნესი წამოიწყო. მისი ბიზნესსაქმიანობა ძირითადად სოფლის მეურნეობას, ინდუსტრიულ სფეროსა და სამოქალაქო საზოგადოების განვითარებას მოიცავს. თამაზ სომხიშვილი კომპანიებს ფლობს რუსეთში, ევროპასა და საქართველოში. ასევე არის საქართველოს ბიზნეს ასოციაციის სამეურვეო საბჭოს
წევრი და საქართველოს განათლების, მეცნიერებისა და ტექნოლოგიების ფონდის დამფუძნებელი და პრეზიდენტი.

კიდევ ერთი სამთავრობო აგარაკი, უფრო ადრე, 2014 წელს, საქართველოს პირველი პრეზიდენტის ქვრივს მანანა არჩვაძე-გამსახურდიას გადაეცა დაბა წყნეთში, სტალინის ქუჩაზე მდებარე შენობა-ნაგებობები და მათზე დამაგრებული 4 580 კვ.მ. არასასოფლო-სამეურნეო დანიშნულების მიწის ნაკვეთი სიმბოლურ ფასად 1 ლარად (წაიკითხეთ ვრცლად 1 ლარად გადაცემული ქონების შესახებ)

ასეთია წყნეთის სამთავრობო აგარაკების უკანასკნელი წლების ისტორია. პრემიერ ივანიშვილის დაპირება ნაწილობრივ შესრულდა და ამ ქონებით სამთავრობო წარმომადგენლები აღარ სარგებლობენ. თუმცა, საზოგადოება კვლავაც ელოდება დაპირების მეორე ნაწილის შესრულებას, რაც ამ ქონების ეფექტურად გამოყენებას გულისხმობდა. სახელისუფლებო პირებისვე თქმით, კოტეჯების იჯარით გაცემა არ არის იმდენად ეფექტური, როგორც მათი გაყიდვა და ამ გზით ინვესტიციის მოზიდვა იქნება.

ნანა მღებრიშვილი
AMBEBI.GE



15:51 / 07-05-2017
82
0
"ამ ქონებით სამთავრობო წარმომადგენლები აღარ სარგებლობენ." ეგ რა ქონებაა მათთვის? ეგღა აკლდათ წყნეთში დაისვენონ. კანარი და მალდივები მაგათია. მთავარია პრემიები და დანამატები არ მოაკლდეთ, თორემ თვალიც დასდგომია აგარაკებს.
18:40 / 06-05-2017
Ia
0
ზვიადს უტოლებ თავს? რა გაგიკეთებია მისი მემილიონედიც კი.
მსგავსი სიახლეები
გიორგი კვირიკაშვილი ქართულ დიასპორას მაცხოვრის შობის სახელობის საკათედრო ტაძარში შეხვდა
+VIDEO "ქართული ოცნების" ხელისუფლებაში მოსვლის შემდეგ სამთავრობო აგარაკით არცერთ მაღალჩინოსანს არ უსარგებლია
ამ კატეგორიის სხვა სიახლეები
19:36 / 23-09-2017  Image ბოლო ინფორმაცია დაბა წაღვერიდან - არსებობს თუ არა ხანძრის გავრცელების საფრთხე
"სიტუაციას ამ ეტაპზე ვაკონტროლებთ"
16:26 / 23-09-2017  Image მოქალაქეების საოცარი ჟესტი: ათასობით ამსტერდამელი მომაკვდავი მერის სახლთან შეიკრიბა მისთვის პატივის მისაგებად
+VIDEO ტაშისა და აპლოდისმენტების შემდეგ, შეკრებილებმა სიმღერა "Aan de Amsterdamse grachten" შეასრულეს
11:10 / 23-09-2017  Image "შეერთებულ შტატებს "ომი" აქვს რუსეთთან..." - მორგან ფრიმანის ვიდეომიმართვამ რუსები განარისხა
"ემოციური გადატვირთვის მსხვერპლი" - მორგან ფრიმანი რუსული საზოგადოების კრიტიკის ქარცეცხლში
22:48 / 22-09-2017  Image ლვოვის სასამართლომ მიხეილ სააკაშვილთან დაკავშირებით გადაწყვეტილება გამოაცხადა
+VIDEO მოსამართლის გადაწყვეტილებით მიხეილ სააკაშვილი ცნობილია დამნაშავედ
15:44 / 23-09-2017  Image საოცარი სახლი, სადაც ტიციან ტაბიძის და ნინო მაყაშვილის სიყვარული ცხოვრობდა...
მისაღებში ახლაც დგას ის ძველი მრგვალი მაგიდა, რომელზეც ზამთარ-ზაფხულ წითელმიხაკებიანი ლარნაკი იდგა...
ინტერნეტკონფერენცია
კონტაქტი

პალიტრამედიის ცხელი ხაზი:

5 77 11 11 30

ელ. ფოსტა: info@ambebi.ge

მისამართი: თბილისი, იოსებიძის ქ.#49