გიგი უგულავა - გადაუჭარბებლად შეგვიძლია ვთქვათ, რომ "ქართულმა ოცნებამ" და ბიძინა ივანიშვილმა მოსახლეობას კონსტიტუცია თავზე გადაახია

"ქართულმა ოცნებამ" და ბიძინა ივანიშვილმა დღეს თითოეულ თქვენგანს, ჩვენს მოსახლეობას თავზე გადაახია კონსტიტუცია, - ამის შესახებ "ევროპული საქართველოს" ერთ-ერთმა ლიდერმა გიგი უგულავამ დღეს გამართულ პრესკონფერენციაზე განაცხადა.

როგორც გიგი უგულავამ აღნიშნა, "ქართული ოცნების" უმრავლესობამ დღეს პირველი მოსმენით დაამტკიცა, პრაქტიკულად, ახალი კონსტიტუცია.

"კონსტიტუცია, რომელიც საზოგადოების ზურგს უკან იქნა მიღებული, არ ეფუძნება საზოგადოების, არასამთავრობო ორგანიზაციის, პოლიტიკური პარტიების კონსენსუსს. ეს არის ერთპიროვნულად ბიძინა ივანიშვილისა და "ქართული ოცნების" კონსტიტუცია. შეგახსენებთ, რომ ამ კონსტიტუციით თქვენ, საქართველოს თითოეულ მოქალაქეს წაგართვეს პრეზიდენტის არჩევის უფლება. შეგახსენებთ, რომ ამ კონსტიტუციით თქვენ, საქართველოს თითოეულ მოქალაქეს წაგართვეს და გადაგივადეს სამართლიანი საარჩევნო წესით საუთარი პარლამენტის არჩევის უფლება. შევახსენებთ საზოგადოებას და განსაკუთრებით, ჩვენს გლეხობას, რომ ეს კონსტიტუცია ითვალისწინებს პირდაპირ შეთქმულებას ქართველი გლეხის წინააღმდეგ იმიტომ, რომ თქვენ, მიწათმფლობელო ქართველო გლეხებო, თქვენი მიწის სურვილით გაყიდვის შემთხვევაში, შეგიმცირეს პოტენციური მყიდველები, ამით გააიაფეს თქვენი მიწა", - განაცხადა გიგი უგულავამ და დასძინა, რომ კოლექტიური თოფაძეები თუ ივანიშვილები იაფად შეისყიდიან მიწებს.

მისივე თქმით, ამ კონსტიტუციით დააკანონეს, რომ ოჯახი არის ქალისა და მამაკაცის ერთობა, "თითქოს ეს აქამდე არ ვიცოდით და ამ ცვლილებებით სტიგმატიზაცია მოახდინეს საზოგადოების გარკვეული ჯგუფების".

როგორც გიგი უგულავამ აღნიშნა, ეს კონსტიტუცია არ ემყარება საზოგადოებრივ კონსენსუსს.

"ჩვენ გადაუჭარბებლად შეგვიძლია ვთქვათ, რომ "ქართულმა ოცნებამ" და ბიძინა ივანიშვილმა დღეს თითოეულ თქვენგანს. ჩვენს მოსახლეობას თავზე გადაახია კონსტიტუცია. ამაზე პასუხი შეიძლება იყოს მხოლოდ ერთი - მშვიდად, მტკიცედ, მაგრამ გაბრაზებულებმა, თითოეულმა მოქალაქემ მივიდეთ არჩევნებზე და დავსაჯოთ "ქართული ოცნება", - განაცხადა უგულავამ.