"სააკაშვილმა რუსული კვალი ხელისუფლების შიგნით და თავისი ბიძის უკან ეძებოს!"

ქვეყანაში მიმდინარე პროცესებზე "ქართული პარტიის" თავმჯდომარე სოზარ სუბარი გვესაუბრება:

- ბატონო სოზარ, როგორც ყოფილი ჟურნალისტი, როგორ შეაფასებთ "მედიაპალიტრაში" მიმდინარე მოვლენებს?

- ხელისუფლება დიდი ხანია ცდილობს მასმედიის სრულ დამორჩილებას. ის, რაც ხდება დღეს "მედიაპალიტრაში", ამის ნაწილია. ფინანსურმა ორგანოებმა სწორედ მაშინ დაიწყეს მედიასახლის შემოწმება, როდესაც ყველაზე ნათლად გამოჩნდა თავისუფალი მედიის მნიშვნელობა. რომ არ ყოფილიყვნენ "მაესტრო", ინტერნეტტელევიზია "პალიტრა TV" და "კავკასია", საზოგადოებას, პრაქტიკულად, არ ეცოდინებოდა, რა მოხდა 26 მაისის ღამეს, გარდა იმისა, რომ ოპოზიცია შეიარაღებული იყო ჯოხებით და აწყობდა სახელმწიფო გადატრიალებას. რა თქმა უნდა, პრესის ჟურნალისტებმაც ძალიან კარგად იმუშავეს, სწორედ ამის გამოძახილი იყო ერთდროულად "მედიაპალიტრის" ექვს შპს-ში შევარდნა, თანაც ისე, რომ თითქოს ამას თავისუფალ მედიასთან კავშირი არ აქვს. ცდილობენ, მედიამფლობელების დაშინებას - თუ არ გაჩერდებით, თქვენს ბიზნესს შეექმნება საფრთხეო.

წარსულშიც მსგავსი ზეწოლის არაერთი ფაქტი გვახსოვს, მაგალითად, "მაესტროს" ეზოში ყუმბარის აფეთქება, რის შემდეგაც პოლიცია ადგილზე საათნახევრიანი დაგვიანებით მივიდა და ეს ფაქტი დღემდე არ გამოუძიებიათ. ისიც გვახსოვს, როგორ გამოიყენა მიხეილ სააკაშვილმა ბათუმში დამოუკიდებელი ტელეკომპანია "25-ე არხის" წინააღმდეგ ის დავალიანება, რომელიც ასლან აბაშიძემ გამოიგონა.

ხოლო როდესაც ქართველი და საერთაშორისო საზოგადოების მოთხოვნით  ხელისუფლება იძულებული შეიქნა, დათმობაზე წასულიყო და ამ არხისთვის ჩამოეწერა საკმაოდ მცირე დავალიანება, ამით ისარგებლა ხელისუფლებამ და 30-მილიონიანი დავალიანება ჩამოაწერა თავის არხებს. რატომ არ ატარებენ შემოწმებას "რუსთავი-2"-ში, "იმედსა" და "პირველ არხზე"? რატომ ხდება, რომ 25-ლარიანი დავალიანების გამო, ტელეკომპანია "კავკასიას" საგადასახადო ლამისაა ტერორს უწყობს, დროზე დაფარეთ დავალიანებაო, თავის ტელევიზიებს კი  მრავალმილიონიან დავალებებს წლობით მიუტევებენ?

-  რა ხდება "ქართულ პარტიაში"? ამბობენ, რომ თქვენი პარტია დაიშალა...

- თქვენ გადაწყვიტეთ, ეგრეა თუ არა! ახლა ამ ინტერვიუს იწერთ ჩვენი პარტიის ოფისში, სადაც ხალხი ძველებურად მუშაობს. ცხადია, ცვლილებები არის - პარტია დატოვა რამდენიმე  ლიდერმა და მათთან ერთად წევრების ნაწილმა, თუმცა პარტიის სტრუქტურა შენარჩუნებულია.

- რატომ  წავიდნენ კოკა გუნცაძე და ლევან გაჩეჩილაძე პარტიიდან?

- თვითონ გააკეთეს განცხადება და რასაც ამბობენ, სავსებით საკმარისია. ის, რომ "ქართული პარტია" დღეს არ აქტიურობს, მხოლოდ ლიდერების წასვლით არ არის გამოწვეული, ამის მიზეზია ისიც, რომ 26 მაისის შემდეგ ბევრი რამის გადახედვა გახდა საჭირო.

- ნინო ბურჯანაძე "ქართულ პარტიას" ადანაშაულებს, რომ მან ხელისუფლების თამაში ითამაშა, ის ასევე ამბობს, რომ თქვენ თავიდანვე დაუპირისპირდით "სახალხო კრებას" და ცდილობდით მის დისკრედიტაციას...

- არ ვაპირებ აბსურდულ განცხადებებს ვუპასუხო, თუმცა, მთელი ამ პერიპეტიებისთვის თვალის გადავლება ურიგო არ იქნებოდა. როცა "სახალხო კრებამ" შარშან 25 ნოემბერი რაღაც პროცესის დაწყებისა თუ დასრულების თარიღად გამოაცხადა და საზოგადოებაში დიდი იმედი გააჩინა, ირაკლი ოქრუაშვილმა განაცხადა, რომ ამ თარიღისგან არაფერს ელოდა, რადგან ეს იქნებოდა მორიგი საპნის ბუშტი.

ეს იყო პოლიტიკური შეფასება, რაც, როგორც მერე გამოჩნდა, რეალობას ასახავდა. ჩვენ ვნახეთ, რაც მოხდა 25 ნოემბერს - იმ დღეს ნინო ბურჯანაძეს საკუთარი დაცვა იცავდა იქ შეკრებილი გაბრაზებული ხალხისგან. ამას მოჰყვა ცილისწამებათა კასკადი ლევან გაჩეჩილაძის მისამართით. დღემდე გამოცანად რჩება, რატომ მოიგონა ნინო ბურჯანაძემ ეს ყველაფერი, ან რატომ არ თქვა მაშინ, როცა პრეზიდენტის მოვალეობის შემსრულებელი იყო და შეეძლო ერთდროულად გაჩეჩილაძის პოლიტიკური კარიერაც დაესრულებინა და სააკაშვილისაც. ცხადია, თავის დროზე არ თქვა იმიტომ, რომ სათქმელიც არაფერი ჰქონდა.

- მაგრამ თქვენ 23 მაისს მიხვედით "სახალხო კრების" აქციაზე, გამოხვედით სიტყვით და დააანონსეთ ოქრუაშვილის ჩამოსვლა...

- 25 ნოემბრისა არ იყოს, არც 21 მაისს დაგეგმილი არმაგედონის იმედი გვქონდა, რადგან კარგად გვესმოდა, რომ მხოლოდ ნინო ბურჯანაძეს და "სახალხო კრებას" არ ჰქონდათ საკმარისი ძალა სერიოზული პროცესის არათუ დასამთავრებლად, არამედ დასაწყებადაც კი. სწორედ ამიტომ, აქციების დაწყებამდე არაერთხელ შევთავაზეთ "სახალხო კრებას", ერთობლივად გვემოქმედა, რაზეც უარი მივიღეთ. 

როცა 21 მაისის შემდეგ პროცესი დაღმა წავიდა, ნათელი გახდა, რომ ეს უშედეგო აქციები ავნებდა არა მხოლოდ "სახალხო კრებას" და ნინო ბურჯანაძეს, არამედ ყველას - სრულიად საზოგადოებას და ქვეყანას. გაჩნდებოდა იმედგაცრუება, რომლის გადალახვას დიდი დრო დასჭირდებოდა, სწორედ ამიტომ გადავწყვიტეთ, პროცესში ჩავრთულიყავით. თუმცა შემდეგ მოვლენები მაინც ისე განვითარდა, რომ იძულებული ვიყავით გვერდზე გავმდგარიყავით.

- ბურჯანაძის თქმით, ის ითხოვდა თქვენგან პასუხს კითხვაზე, რა გზით შემოვიდოდა ირაკლი ოქრუაშვილი ქვეყანაში, ეს რა, არ იყო ლეგიტიმური კითხვა?

- დიახ, იყო, თუმცა გაცილებით ლეგიტიმური იყო ჩვენი კითხვა, რა გეგმით აპირებდნენ მოქმედებას. რაზეც ვერ მივიღეთ პასუხი. ირაკლის ჩამოსვლის გეგმა მის პიროვნულ უსაფრთხოებასთან იყო დაკავშირებული, ხოლო "სახალხო კრების" გეგმების ცოდნის გარეშე ჩვენს მხარდამჭერებს ვერ მოვუწოდებდით აქციებში მონაწილეობისკენ, რადგან ამას შეიძლება გაუთვალისწინებელი შედეგი მოჰყოლოდა. ეს იქნებოდა უპასუხისმგებლობა როგორც ჩვენი მხარდამჭერების, ისე მთელი საზოგადოების წინაშე. დღევანდელი გადასახედიდან ჩანს, რომ ჩვენი იქ მისვლა უფრო დიდ მსხვერპლს გამოიწვევდა.

- მაინც როგორ აპირებდა ირაკლი ოქრუაშვილი საქართველოში შემოსვლას, ან აპირებდა კი საერთოდ?

- ცხადია, ირაკლი აპირებდა ჩამოსვლას, ისევე როგორც ის აპირებდა ჩამოსვლას 2009 წლის აქციებისას, ორი წლის წინ. მაშინ ის ერთადერთი მიზეზის გამო არ ჩამოვიდა - ოპოზიციამ საჭიროდ არ მიიჩნია მისი ჩამოსვლა. ოპოზიცია თითქმის დარწმუნებული იყო, რომ სააკაშვილს მალე ჩამოაგდებდა და, როგორც ჩანს, აღარ უნდოდა კიდევ ერთი მეწილე გამარჯვებაში. ამჯერად კი ირაკლი ოქრუაშვილის ჩამოსვლა გადაიდო ჩვენი საერთო გადაწყვეტილებით. შემიძლია თამამად გითხრათ, რომ 2009 წელს ის იყო ძალიან ახლოს საქართველოს საზღვართან და ეს არ იყო ჩრდილოეთის საზღვარი.

- ხელისუფლება ამბობს, რომ ქვეყანაში სახელმწიფო გადატრიალების მცდელობა იყო...

- რა, სპეცრაზმმა როგორც კი მომიტინგეთა პირველი კორდონი გაარღვია, იქ რუსული სპეცრაზმი დახვდა? ვინ იყო იმ აქციაზე გადამტრიალებელი - იქ მყოფი რამდენიმე ასეული აქტივისტი თუ ლუკა კურტანიძე და ნონა გაფრინდაშვილი? სად ნახეს ეს შეთქმულება?

- ხელისუფლება და საზოგადოების ნაწილი თქვენს პარტიას პრორუსულ ძალად მიიჩნევს...

- რუსულ კვალს საქართველოში ნამდვილად ვხედავ კობა ნაყოფიასა და იმ რუსულ კომპანიაში, რომელიც მართავს ქართულ ოქროს; კახა ბენდუქიძეში, რომელიც ეფ-ეს-ბეს ნომენკლატურის ნაწილი იყო და მის ბიზნესებს განაგებდა რუსეთში. რუსულ კვალს ვხედავ რუსებისთვის ჩაბარებულ "ენგურჰესში" და სულ ახალახან ისევ რუსებისთვის მიყიდულ  "ხრამ-1"-სა და "ხრამ-2"-ში.

რაც შეეხება რუსეთთან ურთიერთობის დარეგულირებას, ეს რომ რუსეთზე მეტად საქართველოს სჭირდება, ამას ყველა ხვდება სულელის გარდა. იმავეს გვეუბნებიან ჩვენი დასავლელი მეგობრები, აშშ, ევროკავშირი, ევროპის ქვეყნები... სააკაშვილმა რუსული კვალი ეძებოს ხელისუფლების შიგნით და ეძებოს თავისი ბიძის თემურ ალასანიას უკან, რომელიც საქართველოში სახელმწიფოებრივი გადაწყვეტილებების მიღებაში დიდ როლს თამაშობს. სხვათა შორის, ეს ის ადამიანია, რომელიც თავის დროზე ირაკლი ოქრუაშვილმა დააპატიმრა, მაგრამ სააკაშვილმა გააშვებინა.

- სერიოზულად გაგაკრიტიკეს ამერიკის საელჩოსთან გამართული საპროტესტო აქციის შემდეგ...

- ამერიკის საელჩოსთან აქცია გავმართეთ ერთი მიზნით: მოვუწოდოთ ამერიკას, შეწყვიტოს ავტოკრატიის მხარდაჭერა და დაეხმაროს დემოკრატიას, რადგან სწორედ დემოკრატიის მხარდაჭერა არის ქართული სახელმწიფოს მხარდაჭერა. ჩვენ ყველაფერი უნდა გავაკეთოთ იმისთვის, რომ ამერიკას არ მივცეთ საშუალება, თვალი დახუჭოს საქართველოში ავტოკრატიისა და ტირანიის განმტკიცებაზე. ამისთვის კი საჭიროა, მსგავსი აქცია ხშირად მოვაწყოთ და არა მხოლოდ "ქართულმა პარტიამ", არამედ სხვა პარტიებმაც და სამოქალაქო საზოგადოებამაც.

ჩვენ ყოველთვის უნდა ვცადოთ ჩვენი სახელმწიფოებრივი ინტერესების გატარება, რაც სულაც არ არის ადვილი საქმე. მაგალითად, საქართველოს ხელისუფლება აპირებს, კიდევ უფრო გაზარდოს ავღანეთში ჩვენი სამხედრო კონტინგენტი. ცხადია, აშშ ამის წინააღმდეგი არ იქნება, სააკაშვილის ხელისუფლებასაც ეს სჭირდება დასავლეთისთვის ერთგულების დასამტკიცებლად, მაგრამ შედის კი ეს ქართული სახელმწიფოს ინტერესებში? რა თქმა უნდა, ჩვენ მსოფლიოს ნაწილი ვართ და ყველაფრისგან განზე ვერ გავდგებით, მაგრამ თუ ნატოს წევრი ქვეყნები - ლატვია, ლიტვა, ესტონეთი - ჯამურად, ასი კაცით არიან  კოალიციურ ძალებში წარმოდგენილი, საქართველო რატომ უნდა იყოს 1600 კაცით? იმიტომ, რომ დასავლეთისთვის სხვა არაფერი გვაქვს შესათავაზებელი? რაღა ადამიანების სიცოცხლით უნდა მოვიპოვოთ მათი მხარდაჭერა? 

- ლევან გაჩეჩილაძე ახალი ერთიანი ოპოზიციური ფლანგის შექმნას გეგმავს, იქნება იქ "ქართული პარტიაც"?

- სანამ არ შეიქმნება, მანამდე ადრეა ამაზე ლაპარაკი.

ნათია დოლიძე

ყოველკვირეული გაზეთი "ყველა სიახლე"

(გამოდის ოთხშაბათობით)