პირველკლასელები "ქართული ოცნების" დროშებით - რას ამბობს სკოლის დირექტორი ფოტოზე, რომელსაც მითქმა-მოთქმა მოყვა

პირველკლასელები "ქართული ოცნების" დროშებით - რას ამბობს სკოლის დირექტორი ფოტოზე, რომელსაც მითქმა-მოთქმა მოყვა

შუახევში, სოფელ სხეფში პირველი კლასის მოსწავლეებს 15 სექტემბერს ყვავილების ნაცვლად პარტია "ქართული ოცნების" დროშები დააჭერინეს ხელში. კლასის ხელმძღვანელმა მარინა დარჩაძემ ამის ამსახველი ფოტო სოციალური ქსელ "ფეისბუქის"პირად გვერდზე ატვირთა, რასაც საზოგადოების მხრიდან უარყოფითი შეფასება მოჰყვა.

შუახევის სოფელ სხეფის საჯარო სკოლის დირექტორმა ოთარ დავითაძემ AMBEBI.GE-ს განუცხადა, რომ პედაგოგმა ვერ გათვალა, თუ რა შედეგები მოჰყვებოდა მის ქმედებას. დავითაძის თქმით, საკითხთან დაკავშირებით, სკოლაში არსებული დისციპლინური კომისია იმსჯელებს და პედაგოგის მიმართ გადაწყვეტილებას გამოაცხადებს.

"აღნიშნული შესახებ დისციპლინურ კომისიას მივმართეთ. აუცილებლად განვიხილავთ. შემთხვევა 15 სექტემბერს მოხდა, როდესაც ბავშვები სკოლაში პირველად მოვიდნენ. ფოტოები გაკვეთილების დასრულების შემდეგ გადაიღეს. ისე უხაროდათ ბავშვებს, ამას თუ ასეთი რეაგირება მოჰყვებოდა, კლასის პედაგოგს არ ეგონა. მე პირადად კლასის პედაგოგს ვესაუბრე და მითხრა, რომ არც კი დავფიქრებულვარ ამაზეო. ეს დროშები ბავშვებს ჰქონდათ მოტანილი", - აცხადებს ოთარ დავითაძე.

შეგახსენებთ, რომ ადგილობრივი თვითმმართველობის არჩევნებამდე მხოლოდ ერთი თვეა დარჩენილი. კანონის მიხედვით, სარეკლამო მოწოდებები კონკრეტული პარტიების მხარდასაჭერად, საჯარო დაწესებულებებში აკრძალულია და ჯარიმას ითვალისწინებს. საკითხზე სკოლაში არსებულ დისციპლინურ კომიტეტს გადაწყვეტილება ჯერ არ მიუღია.

მარიკო კეკელიძე

AMBEBI.GE

ასევე წაიკითხეთ: განათლების მინისტრის კომენტარი "ქართული ოცნების" დროშებიანი პირველკლასელების ფოტოზე

იმერეთის გუბერნატორის ხელფასი გაორმაგდა

ორი ობლისა და ორი ბებიას შემზარავი გასაჭირი გურიაში

ფოთისა და ყულევის სანაპიროზე საშტორმო მდგომარეობა გამოცხადდა