თბილისში, თამარაშვილის ქუჩაზე, "საქართველოს ბანკის" სერვისცენტრზე თავდასხმა მოხდა. როგორც "ინტერპრესნიუსს" "საქართველოს ბანკის" პრესსამსახურში განუცხადეს, ბანკის სერვისცენტრზე, რომელიც თამარაშვილის ქუჩაზე მდებარეობს, თავდასხმა დღეს დილის საათებში მოხდა. "თავდამსხმელს ნიღაბი ეკეთა და შეიარაღებული იყო. ცხადია, რომ სერვისცენტს დაცვა ჰყავს, ამიტომ თავდამსხმელს განზრახვა ჩაეშალა. ჩვენ ახლა ვადგენთ, მოახერხა თუ არა მან საერთოდ რამის წაღება. გამოძიება მიმდინარეობს. თავდასხმის დროს არავინ დაშავებულა", - განაცხადეს "საქართველოს ბანკის" პრესსამსახურში. როგორც "ინტერპრესნიუსს" შინაგან საქმეთა სამინისტროში განუცხადეს, მომხდართან დაკავშირებით გამოძიება სისხლის სამართლის კოდექსის 179-ე მუხლით დაიწყო, რაც ყაჩაღობას გულისხმობს.