დაჩი დარჩიას მკვლელობაში ბრალდებულს 15 წლით პატიმრობა მიესაჯა
დიჯეი დაჩი დარჩიას განზრახ მკვლელობისთვის მიხეილ გრძელიშვილს სასამართლომ 15 წელი მიუსაჯა. როგორც "ინტერპრესნიუსს" თბილისის საქალაქო სასამართლოდან აცნობეს, სასამართლომ ბრალდებულ მიხეილ გრძელიშვილის მიმართ დიჯეი-დაჩი დარჩიას განზრახ მკვლელობის ფაქტზე სისხლის სამართლის საქმის განხილვა დაასრულა. სასამართლოს განცხადებით, მიხეილ გრძელიშვილს ბრალად ედებოდა განზრახ მკვლელობა და ცივი იარაღის ტარებისათვის განმეორებით ადმინისტრაციულ სახდელდადებული პირის მიერ ცივი იარაღის ტარება.
"საქმის არსებითად განხილვისას, ბრალდებულმა მ. გრძელიშვილმა თავი არ სცნო დამნაშავედ წარდგენილ ბრალდებაში - გამოიყენა დუმილის უფლება. თბილისის საქალაქო სასამართლომ, საქმის არსებითად განხილვისას საქმეში წარმოდგენილი და სასამართლო სხდომებზე გამოკვლეულ მტკიცებულებათა ერთობლიობით ბრალდებული წარდგენილ ბრალდებებში სრულად ცნო დამნაშავედ. ვინაიდან მიხეილ გრძელიშვილი დანაშაულის ჩადენის მომენტში პირობითი მსჯავრის ქვეშ იმყოფებოდა, სასამართლომ მას საბოლოოდ, სასჯელის სახედ და ზომად 15 წლით თავისუფლების აღკვეთა განუსაზღვრა", - აცხადებენ სასამართლოში.
მათივე ინფორმაციით, მოცემულ სისხლის სამართლის საქმეზე 9 სასამართლო სხდომა გაიმართა. სასამართლო პროცესზე ბრალდების 20 და დაცვის 2 მოწმე დაიკითხა. როგორც სასამართლოში განმარტავენ, სასამართლოს განაჩენი შეიძლება გასაჩივრდეს სააპელაციო წესით, თბილისის სააპელაციო სასამართლოს სისხლის სამართლის საქმეთა პალატაში განაჩენის გამოცხადებიდან ერთი თვის ვადაში, თბილისის საქალაქო სასამართლოს სისხლის სამართლის საქმეთა კოლეგიის მეშვეობით.
დაპირისპირება თბილისის ცენტრში - რამდენიმე მამაკაცი ფიზიკურად გაუსწორდა
"სათამაშო ბიზნესი "ქართულ ოცნებაში" ე.წ. შავ სალაროს ავსებს" - ვინ მფარველობს ონლაინკაზინოებს?
