გახმაურებული გაუხსნელი მკვლელობები საქართველოში

გახმაურებული გაუხსნელი მკვლელობები საქართველოში

ეროსი კიწმარიშვილის, ბესიკ ხარძიანიას და კიდევ რამდენიმე ცნობილი პერსონის მკვლელობის საქმე ან გაუხსნელია, ან გახსნილი, თუმცა საქმის დეტალები საზოგადოებისთვის წლებია ბურუსით მოცულია და კითხვებს აჩენს. AMBEBI.GE სტატიაში გაგახსენებთ წლების წინ მომხდარ რამდენიმე მკვლელობას, რომლებზეც თავის დროზე ბევრი ითქვა და დაიწერა, თუმცა უკვე თითქმის ათეულ წელზე მეტია, ამ საქმეების გამოძიებაში ახალი არაფერია და ისინი კვლავ გაუხსნელად ითვლება...

დავით ბახტაძის მკვლელობა

2001 წლის 29 ოქტომბერს, ღამის თორმეტის ნახევარზე, აეროპორტის დასახლებაში, დაუდგენელი პირები თავს დაესხნენ "აირზენას" გენერალური დირექტორის თამაზ გაიაშვილის ავტომობილს. თავდასხმის დროს მოკლეს გაიაშვილის დისშვილი - 27 წლის დავით ბახტაძე, რომელიც ბიძის მანქანას მართავდა. მას 3 ტყვია ესროლეს, აქედან 2 - საკონტროლო. თავდამსხმელებს ბახტაძე ბიძაში შეეშალათ.

დუდუ დადიანის მკვლელობა

33 წლის დუდუ (დავით) დადიანი 2002 წლის 22 იანვარს მოკლეს. კალათბურთის ფედერაციის ვიცე-პრეზიდენტს კილერმა სპორტის დეპარტამენტის შენობის შესასვლელში მაკაროვის სისტემის პისტოლეტიდან რვაჯერ ესროლა. მოკლულს სამი ჭრილობა ჰქონდა. მეგობრებმა დაჭრილი კიბეზე იპოვეს. თვითმხილველები ამბობდნენ, რომ მკვლელი სპორტულ ტანსაცმელში გამოწყობილი ახალგაზრდა მამაკაცი იყო, რომელიც შენობაში შესვლიდან 5 წუთში გამოვიდა და გაიქცა... ერთ-ერთი ვერსიით, მკვლელობას ჰყავდა ერთი თვითმხილველი, რომელიც მოგვიანებით კიკვიძის ბაღში მოკლეს. ამ გახმაურებული და ბურუსით მოცული მკვლელობის გამოძიება ორჯერ დაიწყო, თუმცა ახალი არაფერი გარკვეულა, არც დადიანის მკვლელი დასჯილა. 2012 წლის 30 ნოემბერს დუდუ დადიანის ოჯახმა მთავარ პროკურატურაში განცხადება შეიტანა და საქმის ხელახალი გამოძიება მოითხოვა...

კახი ასათიანის მკვლელობა

ბიზნესმენის, "აირზენა საქართველოს ავიახაზების" ვიცე-პრეზიდენტი, კახი ასათიანი, 2002 წლის 20 ნოემბერს, თბილისში, აბაშიძის ქუჩაზე, საღამოს 19:00 საათზე საკუთარ ავტომანქანაში ჩაცხრილეს. 16 ტყვიიდან მსხვერპლს 7 მოხვდა. ასათიანი ადგილზე გარდაიცვალა. "აირზენას" ვიცე-პრეზიდენტის მკვლელობასთან დაკავშირებით, ორი ვერსია ვრცელდებოდა: პირველი მის საქმიანობას უკავშირდებოდა. კერძოდ, თითქოს, კახი ასათიანის ლიკვიდაციით კანონიერი ქურდი ტარიელ ონიანი იყო დაინტერესებული. მეორე ვერსიით კი, ასათიანი შურისძიების მსხვერპლი გახდა და მისი მკვლელობა დუდუ დადიანის მკვლელობის გაგრძელება იყო.

ბახტაძის, ასათიანისა და დადიანის მკვლელობის საერთო მიზეზზე ბევრს საუბრობდნენ, რომ სამივე მკვლელობა ერთი და იმავე პირის მიერ იყო დაკვეთილი, მაგრამ ვინ იყო ეს იდუმალი მკვლელი, ამაზე პასუხი ჯერ არ არსებობს...

გურამ თევზაძის მკვლელობა

თავდაცვის ყოფილი მინისტრის, დავით თევზაძის ძმა, გურამ თევზაძე 2000 წლის 1 ივნისს, დიდ დიღომში განხორციელებული ტერაქტის შედეგად დაიღუპა. არსებული ინფორმაციით, ეს იყო წინასწარ დაგეგმილი ტერორისტული აქტი. გაუხსნელ საქმეზე ყოფილმა თავდაცვის მინისტრმა დავით თევზაძემ ცოტა ხნის წინ დაწერა: "დღეს 2015 წლის 1 ივნისია. 15 წელი გავიდა რაც ჩემი ძმა, გურამ თევზაძე უღმერთოდ მოკლეს. დღემდე არც ერთ ხელისუფალს არ გახსენებია, რომ ტეაქტს გამოძიება ჭირდება, მკვლელს პოვნა, ხოლო ნაპოვნს გასამართლება. და ამ დროს არანაირი მნიშვნელობა არა აქვს, ვინ ვისი ძმაა, მამაა თუ შვილი. ხანდაზმულობის ვადა აქ არ მოქმედებს. ასეთ ვითარებათა გამოა, რომ ხელისუფალნი კარგავენ ნდობას. თუ ვინმე ფიქრობს, რომ ჩემი ძმა არავის გაახსენდება, ცდება ძალიან. ბევრნი ვართ, ვისაც გვახსოვს. სახელმწიფოს ხათრით, ჯერ კიდევ სახელმწიფოს ველოდებით. შეგვიძლია ველოდოთ კიდევ. ერთ დღეს უფალი აუცილებლად მიგვანიშნებს ვისზე და როგორ ვიძიოთ შური, და იმ დღეს, ვფიცავარ, ისევე დაუნდობლები ვიქნებით, როგორც ისინი, ვინც 15 წლის წინ ჩემი ძმა მოკლა".

გურამ შარაძის მკვლელობა

2007 წლის 20 მაისს, ყოფილი პარლამენტარი, აკადემიკოსი გურამ შარაძე თბილისში, მელიქიშვილის გამზირზე მოკლეს. ცეცხლსასროლი იარაღიდან მიყენებული სამი ჭრილობით იგი ადგილზე გარდაიცვალა. გურამ შარაძის მკვლელობის ბრალდებით სამართალდამცველებმა გიორგი ბარათელი დააკავეს, თუმცა აკადემიკოსის ოჯახის წევრები მკვლელობის პოლიტიკურ მოტივზე საუბრობენ. გურამ შარაძის ქალიშვილის, რუსუდან შარაძის ინფორმაციით, მამამისის მკვლელობაში ახალი მოწმე გამოჩნდა, რომელიც ყოფილი პოლიციელია. 2015 წელს თბილისის პროკურატურამ გურამ შარაძის საქმე მთავარ პროკურატურას გადასცა.

თეა ბეჟიტაშვილი

AMBEBI.GE

დაპირისპირება თბილისის ცენტრში - რამდენიმე მამაკაცი ფიზიკურად გაუსწორდა

"სათამაშო ბიზნესი "ქართულ ოცნებაში" ე.წ. შავ სალაროს ავსებს" - ვინ მფარველობს ონლაინკაზინოებს?

პოლიციელებმა 35 წლის მამაკაცის გატაცებაში ფული აიღეს? - რა ახალ დეტალებს ამჟღავნებს "კურიერი" რუსთავში მომხდარი მკვლელობის შესახებ