სამეგრელოში გაუჩინარებული სამი მამაკაცი გარდაცვლილი იპოვეს

ზუგდიდის რაიონის სოფელ ურთადან გაუჩინარებული სამი მამაკაცი, რომლებსაც ორი დღის განმავლობაში ეძებდნენ, გარდაცვლილი იპოვეს. როგორც "ინტერპრესნიუსის" კორესპონდენტი ადგილიდან იუწყება, ცხედრებს სოფელ ნარაზენში მიაგნეს. არსებული ინფორმაციით, ერთი ხობის მკვიდრია, ხოლო დანარჩენი ორი - ზესტაფონიდან. ცნობილია, რომ ისინი ზუგდიდში მსხვილფეხა რქოსანი საქონლით ვაჭრობდნენ.

ცხედრების პოვნის ადგილზე ექსპერტ-კრიმინალისტები მუშაობენ. მომხდარზე შინაგან საქმეთა სამინისტროში ჯერჯერობით არ საუბრობენ. ორდღიანი ძიების პროცესში სამართალდამცველებმა იპოვეს მიკროავტობუსი, რომლითაც დაკარგულები გადაადგილდებოდნენ. ასევე მდინარე უჩაღელეში მიაგნეს ერთ-ერთი დაკარგულის მობილურ ტელეფონსაც.

"ინტერპრესნიუსი"

ფოტო: რადიო ათინათი