მაგდა პაპიძე გამომძიებელს: "რაში დაგჭირდათ ჩემი წამება თუ ამდენი მტკიცებულებები გქონდათ?"

თბილისის საქალაქო სასამართლოში ქმარ-შვილის მკვლელობაში ბრალდებული მაგდა პაპიძის სასამართლო პროცესი გრძელდება. დღეს პროცესზე საქმის ერთ-ერთი გამომძიებელი ალექსანდრე ფოცხვერაშვილი იკითხება. გამომძიებელს კითხვები ბრალდებულმა მაგდა პაპიძემაც დაუსვა და სამართალდამცველების მხრიდან მასზე განხორციელებული ძალადობა შეახსენა. გამომძიებელმა აღნიშნა, რომ მას არ ახსოვს მსგავსი ფაქტი, ვინმეს მაგდა პაპიძისთვის ფიზიკური ან თუნდაც სიტყვიერი შეურაცხყოფა მიეყენებინა.

პროცესზე მაგდა პაპიძემ ექიმების მიერ გაცემული დასკვნები გააჟღერა, სადაც ბრალდებულის მტკიცებით, მისი წამების შემდგომი დაზიანებებია აღწერილი:

"22 დეკემბერს, როდესაც სასჯელაღსრულების დაწესებულებაში შემასახლეს, შემამოწმა მორიგე ექიმმა. მთელ სხეულზე აღმომაჩნდა სისხლნაჟღენთები და დაზიანებები, რომელიც ექიმმა დასკვნაში აღწერა. კერძოდ, ბეჭებზე, მხრებზე, მუცელზე, ბარძაყზე, მუხლზე, ხელებზე. ღუდუშაურის ექიმმაც ზუსტად ის დაზიანებები აღწერა, რაც ციხის ექიმს ჰქონდა დაფიქსირებული. მისი დასკვნით, დაზიანებები მკვრივი ბლაგვი საგნით არის მიყენებული და დაკავების თარიღს არ ეწინააღმდეგება. რაში დაგჭირდათ ჩემი წამება თუ ამდენი მტკიცებულებები და მოტივაცია გქონდათ?!"- მიმართა პაპიძემ გამომძიებელს.

ბრალდებულის ამ განცხადების საპასუხოდ, ალექსანდრე ფოცხვერაშვილმა აღნიშნა, რომ გამორიცხული არ არის დაზიანებები, რომლებიც მაგდა პაპიძემ დაასახელა, მან იმ დროს მიიღო, როდესაც დანაშაული ჩაიდინა და კვალის დაფარვას ცდილობდა.

იხილეთ ვიდეო

თორნიკე კოშკაძე

AMBEBI.GE