კიევის ოლქში კრიმინალური ავტორიტეტები დააკავეს, რომელთა შორის ორი საქართველოს მოქალაქეა

კიევის ოლქში პოლიციამ ბანდიტური ე.წ. შეკრების მონაწილეები დააკავა. ამის შესახებ კიევის პოლიციის ვებგვერდზე გამოქვეყნებულ ინფორმაციაშია ნათქვამი, რასაც თან ახლავს ვიდეო.

დაკავებულები არიან აღნიშნული შეკრების მონაწილეები, მათ შორის პირები, მეტსახელებით - "კუწუ", "ხმელი" და "ანდრეი ლვოვსკი", რომლებსაც ე.წ. კანონიერი ქურდების სტატუსი აქვთ. პოლიციის ინფორმაციით, დაკავებულთა შორის ორი საქართველოს მოქალაქეა.

ჩხრეკისას ამოღებულია სამი ერთეული დარეგისტრირებული იარაღი. ოპერატიული ინფორმაციით, კრიმინალები იმისთვის შეიკრიბნენ, რომ გადაენაწილებინათ გავლენის სფეროები როგორც კიევში, ისე მთლიანად რეგიონში.

შეკრების ადგილის დათვალიერებისას სამართალდამცველებმა იარაღებთან ერთად დიდი რაოდენობით თანხაც აღმოაჩინეს.