თბილისში აფეთქებაზე მუქარის შემცველი პოსტის გამო 23 წლის პანკისელი ახალგაზრდა დააკავეს
"ხვალ, 12:30 საათზე, თბილისში ფეიერვერკი", - ფეისბუქის ერთ-ერთი მომხმარებელი რომელმაც აფეთქების ფოტო ამ ტექსტით გამოაქვეყნა, დაკავებულია. პანკისის სათემო რადიო WAY-ის ინფორმაციით, სოფელ დუისში მცხოვრები 23 წლის ვ. ხ. დაახლოებით 2 საათის წინ, დუისის საზოგადოებრივ ცენტრში დააკავეს. სახელმწიფო უსაფრთხოების სამსახურის განცხადებით, ფეისბუქში მუქარის შემცველი ტექსტისა და ფოტოს გამოქვეყნებასთან დაკავშირებით გამოძიებას კონტრტერორისტული ცენტრი აწარმოებს.
პოსტი თბილისში შესაძლო აფეთქებასთან დაკავშირებით ვ.ხ-მ გუშინ, საღამოს გამოაქვეყნა. მუქარის შემცველი პოსტი ამ დროისთვის ხელმისაწვდომი აღარ არის. ვ. ხ-ს ატვირთული აქვს ტერორისტული დაჯგუფება "ისლამური სახელმწიფოს" ერთ-ერთი ლიდერის თარხან ბათირაშვილის ორი ფოტო და ფეისბუქზე 37 მეგობარი ჰყავს, რომელთაგან რამდენიმეს მთავარ ფოტოდ "ისლამური სახელმწიფოს" დროშა აქვს დაყენებული.